ПЛАНОТ ЗА РАЗВОЈ НА ЗАПАДЕН БАЛКАН Е ДОБРОНАМЕРЕН, НО НАИВЕН Проекциите на ЕК се преоптимистични, вели Трајко Славески
Наивно е да се очекува дека би се остварила целта за удвојување на БДП по глава на жител во земјите од Западен Балкан за една декада, за што е потребна годишна стапка на раст на БДП од дури 7% - вели поранешниот министер за финансии во интервју за „Блумберг ардија“.
Во услови на наплив на популизам од страна на владата на ДУИ и СДСМ не може да се очекува стабилизирање, а камо ли намалување на јавниот долг во Република Македонија во наредната година – вели во интервју за „Блумберг адриа“ поранешниот министер за финансии Трајко Славески, во кое покрај за јавниот долг, говори и за буџет, инфлација, планот за раст на земјите од Западен Балкан предложен од страна на ЕК.
– Кон сумата од 8 млд евра јавен долг треба да се додадат и долговите на ЈП и здравствените установи на централно и на локално ниво. ЈП и установите се зафатени од синдромот “меки буџетски ограничувања”, карактеристичен за економските субјекти од времето на социјализмот. Проектираните буџети имаат третман на обично парче хартија, кое не е ниту рамка. Буџетите се „условни“, што значи дека нема никаков притисок за ефикасно и домаќинско работење, што во согласност со нашиот менталитет и култура на неказнивост отвара простор за расипништво и корупција со парите на граѓаните – вели Славески.
Оттаму, вели поранешниот министер, цената на новите задолжувања на домашниот и на меѓународниот финансиски пазар, неопходни за хранење на „аждајата“ е во постојан пораст и само го зголемува товарот врз идните генерации.
– Половина од дефицитот во државната каса, проектиран за 2024 година, отпаѓа на камати на долгови од претходниот период и овој сооднос ќе се влошува и понатаму доколку не се пристапи кон посериозна фискална консолидација. Такво нешто е илузорно да се очекува
од актуелната влада, особено не во изборна година – вели Славески.
Според него, нема сомнение дека Европска Комисија со најавениот План за раст на земјите од Западен Балкан сака да му помогне на регионот побрзо да се развива, во отсуство на јасна перспектива за полноправно членство во ЕУ во догледно време.
– Но, наивно е да се очекува дека би се остварила целта за удвојување на БДП по глава на жител во земјите од Западен Балкан за една декада, за што е потребна годишна стапка на раст на БДП од дури 7%. На случајот на Република Македонија ова е далеку од реално со оглед на капацитетот на економијата и на институциите. Ако тоа било така лесно да се постигне со околу 800 милиони евра, колку што се очекува да изнесува помошта за РМ, дел поволни кредити, а дел како грантови, владата предводена од „првиот вицепремиер“ Артан Груби ќе го оствареше, имајќи ги во вид бездушните трошења на парите на нашите граѓани. Наместо ова, во континуитет бележиме една од најниските стапки на раст во регионот што во просек не достигнува ниту 2% – вели поранешниот министер за финансии Трајко Славески во интервју за „Блумберг ардиа“.