ПИШИ-БРИШИ СО ДОГОВОРОТ ЗА НАДЗОР Хрватски ИГХ не достави банкарска гаранција

Јавното претпријатие за државни патишта го поништи тендерот на кој за надзор врз изградбата на новите автопати беа избрани фирми од Хрватска и од Македонија, тврди македонскиот портал „Фактор“.

Раководството на ЈПДП за „Фактор“ соопштило дека постапката е поништена и договорот што беше потпишан минатата недела е неважечки, затоа што добитникот на тендерот не доставил банкарска гаранција на износ од 2,6 милиони евра.

„Со оглед на фактот што по извршениот избор најповолниот понудувач не го испочитува рокот за достава на Банкарска гаранција за навремено и квалитетно извршување на договорот за Надзор и правен трансакциски советник за изградба на Коридор VIII и Коридор X-d.кој беше до 05.08.2022 година со што ја прекрши Изјавата за сериозност, договорот нема правно дејство и можност за реализација“ – се вели во одговорот на ЈПДП.

Како што веќе објави Плусинфо, договорот беше склучен на 3 август годинава помеѓу ЈПДП и групата понудувачи предводени од „ИГХ Институт“ од Загреб, Хрватска. Вредноста на договорот изнесуваше 22,6 милиони евра, а во информацијата што ИГХ Институт ја достави до Загребската берза пишуваше дека таа на тендерот настапила заедно со македонска фирма со назив „Институт за патишта“ со седиште во Велес.

Хрватската фирма ИГХ Институт постои повеќе од 70 години и нејзина специјалност е консалтинг, надзор и анализи при изградба на објекти. На нивната веб страница пишува дека оваа компанија има лаборатории кои се акредитирани за 500 методи на различни испитувања.

Нема детална инормација за тоа зошто партнерите затаиле со предавање на банкарската гаранција.

Македонската фирма „Институт за патишта ДООЕЛ“ Велес е основана со влог од 5.000 евра и за неа нема достапни финансиски податоци. Сопственик е гевгеличанецот Сотир Ампов, по струка економист и сметководител. На прашање на Плусиноф да го коментира поништувањето на договорот со ЈПДП, во кој требаше да биде партнер со хрватскиот ИГХ, Ампов рече дека во овој момент не може да коментира. Според базата на податоци за јавни набавки оваа компанија досега добила два тендери од ЈПДП, минатата година, за надзор над граежни работи.

ЈПДП информира дека во моментов тече рокот на жалба кој е до 19.8.2022 година, по што ќе започне нова постапка за објавување тендер за избор на Надзор и правен трансакциски консултант, што ќе ги води преговорите со американско-турскиот конзорцум „Бехтел и Енка“ кој треба да го гради инфраструктурниот Коридор 8 (делница: Тетово – Гостивар – Букојчани и проектот за автопатот Требеништа – Струга – Ќафасан) и Коридорот 10 Д (делница на автопатот Прилеп – Битола). За изградба на трите нови автопати, Владата минатата година потпиша меморандум со „Бехтел и Енка”, а Собранието донесе Закон за утврдување јавен интерес и номинирање стратешки партнер за проектот.

Со законското решение се уредува проектирањето и изградбата на инфраструктурата на Коридорот 8 и Коридор 10 д, како поединечни проекти за капитални инвестиции од стратешко национално значење за државата. Државната антикорупциска комисија оцени дека со овој закон се ограничува конкуренцијата и можноста од фер натпревар, бидејќи не се предвидува тендерска постапка. Откако Уставниот суд не поведе постапка за оценување на уставноста на Законот, Владата формираше тим за преговори со американско-турскиот конзорциум за изградба на автопатите.