ПЕРИНСКИ НЕМА ДА ДОЗВОЛИ ДА СЕ РАЗГОРИ ВНАТРЕПАРТИСКА БИТКА СО ЃОРЃИЕВСКИ Процесот на избор на кандидат за градоначалник на Скопје ќе биде инклузивен
Министерот за локална самоуправа, Златко Перински, тврди дека Скопје системски се уништува и затоа може да се ревитализира само со системски решенија и со добро менаџирање.
„Никогаш нема јас да дозволам да има внатрепартиска битка затоа што со тие луѓе јас сум растел и сум се развивал во политичкиот живот. И ова сега го говорам од мое гледиште и верувајте ми, така ќе биде и до крај на овој процес. Самата партија, врз основа на анкетите, врз основа на задоволството на граѓаните од оние перформанси кои ние ги испорачуваме како јавни функционери, ќе донесе одлука кој ќе биде потенцијален кандидат за градоначалник на Скопје”.
Ова го изјави министерот за локална самоуправа, Златко Перински, во гостувањето во емисијата „Трилинг” на ТВ24, одговарајќи на прашањето дали расте партиската битка помеѓу него и Орце Ѓорѓиевски за иден градоначалник на Скопје.
Перински ги повика „сите останати коишто функционираат на територија на град Скопје, а се наши членови кои активно се вклучени во политичкиот живот, да пројават интерес за оваа позиција, бидејќи на тој начин ќе стимулираме квалитет”.
– Ниту јас, ниту колегата којшто го споменавте, ниту, пак, кој било друг, има право да монополизира еден ваков процес. Значи, овој процес на селекција на потенцијален кандидат за градоначалничкото столче треба да биде отворен, инклузивен и на база на податоци – изјави Перински.
Министерот за локална самоуправа вели дека Скопје „системски се уништува”.
– Системот на градот Скопје е во целост дерогиран. За да се ревитализира градот Скопје, му треба системски пристап во делот на јавните комунални претпријатија во целина, во делот на јавниот превоз, но не со парцијални решенија. Ем немаме доволно средства, ем сè плаќаме по двапати, бидејќи не пристапуваме системски кон решенијата. Проблемите со превозот, проблемите со загадувањето практично се врзани садови, еден со друг треба да се надополнуваат и еден со друг треба да се решаваат – вели тој.
Перински е убеден дека локалните самоуправи можат да бидат самоодржливи затоа што имаме и такви примери во моментов. Имаме огромна дискрапанца помеѓу општини кои се големи загубари и општини коишто си ја работат ревносно работата. Тој посочува неколку примери:
– Прво, најголемата грешка во оние општини, што се загубари, е во делот на планирање на приходите и на расходите. Значи, тие планираат дека ќе приходуваат 100% од комуналните такси и од даноците на имот, а за жал не го прават тоа во тој процент. Врз основа на проектираната вредност на приходна страна, проектираат расходна страна којашто ја реализираат во целост.
И тука е тој гап којшто се случува помеѓу ненаплатени целосно средства на приходната страна, а реализирана во целост расходна страна. Ете тука се генерира таа загуба. Дополнително, исто така имаме огромна разлика помеѓу локалните самоуправи во делот на колектирање на средствата од сопствени извори на финансирање, коишто, верувајте ми, се многу значајни за самите локални самоуправи и практично тоа е суштината на процесот на децентрализација. Имаме локална самоуправа којашто во изминатите 10 години нема издадено ниту едно даночно решение, а имаме локални самоуправи коишто повеќе од 100% имаат наплата на данок на имот.
Секогаш менаџментот е предуслов за успешно функционирање на локалните самоуправи. Врз основа на тоа менаџирање, зависи и процентот на наплата на долговите, смета Перински и објаснува:
– Значи, секогаш кога кубурите со средства, зборувам сега за локалните самоуправи, вие прво треба да ги видите сопствените потенцијали и ресурси, а потоа да барате заем. Од Владата во минатите години локалните самоуправи секогаш добиваа средства за покривање на загубите, а еве го резултатот. Затоа, ние рековме: „Не, тоа не е добар модел“. Ние ќе финансираме проекти кои ќе им дадат додадена вредност на локалните самоуправи и секако ќе го зголемат квалитетот на живот на граѓаните. Знаете како, можеби една асфалтирана улица во некоја општина ќе стимулира некој приватен стопанственик да направи нова инвестиција, значи и директно и индиректно ја раздвижуваме економијата.
Погледнете го гостувањето на Перински во емисијата “Трилинг”: