Пендаровски: До пред два дена политичките лидери беа блиску до датум за избори

Политичките партии беа блиску до договор за датум за избори, но поради развојот на ситуацијата и порастот на бројот на заболени и починати, разговорите се прекинати, изјави денеска претседателот Стево Пендаровски кој  додаде дека и тој имал комуникација со лидрерите на партиите.

–   Ако ми е дозволено да шпекулирам без да споменувам имиња и датуми, тие беа во рамки од 10 до 15 дена можеби и поблиску според одредени нивни искажувања затоа што во таа нивна комуникациска размена на мислења се спомнува и неработен ден како можност за гласање, не само недела како што е досега, бидејќи тоа е возможно со промена на закон и со уредба со законска сила може да се гласа и во среда да речеме –  рече Пендаровски.

Пендаровски рече дека последните два дена тие комуникации се прекинати.

-Јас веќе реков, и сакам сега да нагласам уште еднаш дека државата не може вечно да биде во вонредна состојба за некако да функционира. Ние ќе мораме да имаме политички институции. Нивно е да решат кога е според нив најдобро да имаме датум за избори, меѓутоа факт е дека короната ќе трае – рече Пендаровски.

Не можеме, рече тој, да кажеме дека во септември, во јули, во август дека ќе биде битно поинаку затоа што државата нужно мора, како и сите држави во светот да се отвора.