ПЕЛАГОНИЈА ДЕМАНТИРА ДЕКА Е ПОД СТЕЧАЈ Комбинатот тврди дека работи и дека ја завршил есенската сеидба
„Во моментов се посеани 6.500 ха есенски култури, што во услови на незапаметена суша во последните години е голем успех за сите вработени и за комбинатот, кој и покрај ниските приноси и финансиски приходи од пролетните култури, успешно ќе ја заврши сеидбата на пченица“, се наведува во демантот од Пелагонија.
Во текстот со наслов „ЗК Пелагонија влегува во стечај“, објавен на порталот Плусинфо, на 20.11.2024 година се изнесени невистинити тврдења за факти кои предизвикуваат штета на угледот на акционерското друштво ЗК Пелагонија, се наведува во демантот од ЗК Пелагонија.
– Имено, тврдењето дека ЗК Пелагонија влегува во стечај, е целосно неточно, тенденциозно и остро го демантираме. Судот никогаш не покренал никаква постапка за стечај против акционерското друштво туку бил оформен предмет по добиена пријава, дотолку повеќе што ЗК Пелагонија ја има сервисирано својата обврска кон добавувачот кој го споменувате, а со тоа, нема ниту можност да се поведе стечајна постапка по барање на компанијата „Бетон“. Комбинатот нема земено ниту 1 евро кредит, а со тоа, тврдењето дека ЗК Пелагонија АД е неликвидно е неточно. За тоа говори и фактот што комбинатот продолжува со своето редовно работење и финализирање на есенската сеидба. Во моментов се посеани 6.500 ха есенски култури, што во услови на незапаметена суша во последните години е голем успех за сите вработени и за комбинатот, кој и покрај ниските приноси и финансиски приходи од пролетните култури, успешно ќе ја заврши сеидбата на пченица“, се наведува во демантот од Пелагонија.
„Пелагонија“ бара овој демант да биде објавен и споделен на истите места каде што претходно беше пласиран текстот во рок од 48 часа, јавно извинување и отстранување или корегирање објавената содржина.
„ЗК Пелагонија ја почитува новинарската професија и е секогаш отворена за новинарите и јавноста, и затоа Ве повикуваме согласно новинарските правила да бидеме контактирани како втора страна, со цел да не се прави штета врз нашето реноме со вака пласирани невистини“, се вели во демантот.
ОДГОВОР НА РЕДАКЦИЈАТА НА ПЛУСИНФО
Редакцијата на Плусинфо се извинува поради непрецизната интерпретација на информација за иницијативата на доверител за поведување стечајна постапка, од која можело да се заклучи дека компанијата „Пелагонија“ е во стечај. Демантот е објавен на истото место каде што е објавена претходната содржина, која е отстранета.