ПЕДОФИЛ 7 ГОДИНИ РАБОТЕЛ ВО ГРАДИНКА ВО ЛОНДОН, ПРИЗНА 26 ДЕЛА НА СЕКСУАЛНА ЗЛОУПОТРЕБА НА ДЕЦА Јавноста во шок, родителите и жртвите добиваат стручна помош

Вработен во градинка се изјасни за виновен за 26 сексуални дела против деца по една од најпотресните и најсложените истраги за сексуална злоупотреба на деца на полицијата во Лондон.

Винсент Чан (45) од Финчли, работел во градинка во северен Лондон помеѓу 2017 и 2024 година.

Делата вклучуваат пет точки за сексуален напад на дете со пенетрација, четири точки за сексуален напад на дете со допир, 11 точки за правење непристојни фотографии или псевдо-фотографии од дете и шест точки за изработка на непристојни фотографии или псевдо-фотографии од дете. Последните дела вклучуваат слики од сите категории дела, вклучувајќи ги и тие со најтешка злоупотреба.

Чан ќе биде суден во Крунскиот суд Вуд Грин на 23 јануари.

Лондонската полицијата соопшти дека ова била една од нивните најпотресни и најкомплексни истраги за сексуална злоупотреба на деца.

Чан бил разоткриен како педофил откако вработен во градинката пријавил дека тој снимил дете како заспива во својата храна со уред издаден од градинката и додал музика за „комедиски цели“ пред да го сподели видеото со своите колеги, се вели во соопштението на полицијата.

Тој потоа бил уапсен во јуни 2024 година под сомневање за занемарување, а полицајците заплениле 25 дигитални уреди од неговиот дом и три од градинката. Чан бил ослободен со кауција, но ја изгубил работата во градинката.

Три месеци подоцна, неговите уреди биле доставени на анализа од полицијата, која била завршена во јули 2025 година. Форензичките тимови пронашле значителна количина непристојни слики и видеа од деца, вклучувајќи докази за сексуални дела со контакт против деца, се наведува во полициското соопштение.

Чан бил уапсен во септември оваа година под сомневање за сексуални дела. Полицајците заплениле уште 26 уреди од неговиот дом, како и 15 од градинката, филијала на „Брајт Хорајзонс“ во Вест Хемпстед, која оттогаш е затворена.

– Сексуалната злоупотреба на деца е едно од најужасните злосторства што можат да се замислат, а делата на Чан се протегале со години, откривајќи пресметан и предаторски модел на злоупотреба – изјави детективот Луис Басфорд, кој ја водеше истрагата.

– Тој се инфилтрираше во средини кои требаше да бидат сигурни засолништа за децата, искористувајќи ја довербата на семејствата и пошироката заедница за да ги прикрие своите постапки и да ги лови најранливите, додаде тој.

– Ја препознаваме заслугата на вработената која ја изрази својата загриженост, бидејќи без тој прв извештај за суровост кон деца, злоупотребата на Чан можеше да продолжи неконтролирано, изложувајќи безброј деца на ризик, потенцираше Басфорд.

Во моментов, полицијата идентификувала четири деца како жртви на Чан.

Семејствата на жртвите се контактирани директно и добиваат специјализирана поддршка, додека НСПЦЦ (Националното друштво за превенција на суровост кон деца) води линија за помош за сите 700 семејства на деца кои ја посетувале градинката за времето кога Чан работел таму (2017-2024).

Во изјава издадена преку адвокатската фирма „Ли Деј“, некои од погодените семејства рекоа: „Како родители, сè уште се обидуваме да го прифатиме морничавото откритие дека нашите деца биле подложени на одвратна злоупотреба од страна на Винсент Чан во градинката.“

„Имаме доверба во судијата дека ќе изрече најстрога казна што одговара на злосторствата што Винсент Чан ги изврши врз малите деца, невини жртви кои не можеа да се одбранат“, се додава во изјавата.