ПАШАЛУКОТ ГО ПРЕТВОРИ СДСМ ВО ФИРМА ВО СТЕЧАЈ Партијата е под сопствениот биолошки лимит околу 120.000-130.000 гласови, вели Мицкоски

СДСМ е сведена под сопствениот лимит на гласови поради безидејноста, предавствата и затоа што стана приватизирана партија, во СДСМ се истите луѓе кои беа поразени на последните избори, кои загубија дебело поради криминал, тендери и национални предавства, рече претседателот на ВМРО-ДПМНЕ, Христијан Мицкоски на денешниот митинг во Чешиново Облешево.

– Сега тие се нудат на политичката сцена, но и тие знаат дека вака нереформирани и целосно безидејни немаат никакви шанси. Затоа што СДСМ е непроменет, и поради тоа што одлуките во таа партија не се носат во седиштето во Скопје, туку на друго место. И најлошото е што Филипче навистина не се ни труди да покаже дека не е слуга на неговиот гуру. Таквата понизност придонесува некогаш големата партија да се сведе на филијала на бизнис-интересите на неколку фамилии. Тоа го гледа обичниот народ, но го гледаат и членовите на СДСМ. Затоа оваа партија сега е под сопствениот биолошки лимит околу 120.000-130.000 гласови, а забрзано од нејзините структури си заминуваат членови и ги враќаат членските книшки – кажа Мицкоски.

Претседателот на ВМРО-ДПМНЕ објасни поради кои причини СДСМ е во таква состојба.

– Тоа е поради три едноставни причини. Во СДСМ нема иднина – целосната безидејност се шири како зараза. Тоа е прва причина. Втората причина е што СДСМ нема компромис кој не го направи на штета на државните интереси. Последното кое го даваат е еден документ кои тие го нарекуваат резолуција или „црвени линии“. Третата причина е што партијата е затворена за нови луѓе, а пашалакот на бизнис-кланови внатре ја претвора во фирма во стечај, а не во партија жедна да направи добро за Македонија. Значи: безидејност, предавства и приватизирана партија се трите причини поради кои народот не гледа никаква алтернатива во оваа партија – заклучи Мицкоски.