„ПАРИ ВО БУЏЕТОТ ИМА“ Филипче на денешниот протест побара покачување на платите на наставниците за 12%

Владата нема оправдување што наставниците ја започнуваат школската година без покачени плати и би рекол понижени и запоставени од Владата, рече лидерот на СДСМ Венко Филипче на денешниот протест на партијата пред Министерството за образование и наука. Тој вели дека пари во буџетот за повисоки плати има, но дека платите за наставниците не се приоритет на новата влада:

– Никој не верува дека нема пари за покачување на платите на наставниците за 12%. Гледаме дека има пари за нови четири министерства и за цела армија партиски вработувања, има пари за луксузирања со скапи авионски карти, има пари измислување на нови директорски места во царина и така натаму. Буџетот има пари, но платите не се приоритет. Ако имаше средства во времето на СДСМ, и тоа во најголемите светски кризи, здравствена, економска, енергетска како нема пари овој септември за да се покачат платите на просветните работници – рече Филипче појаснувајќи дека „денес е тука во поддршка на наставниците и просветните работници кои дојдоа да испратат порака на незадоволство од одлукатa на ВМРО-ДПМНЕ да ја прекине политиката на раст на плати“.

Според Филипче, Мицкоски јасно покажува дека го запоставува образованието, ги запоставува оние кои ни ги учат и воспитуваат децата, а „оправдувањата дека нема пари во буџетот се неприфатливи“.

– Апелирам Владата да се соземе и сфати дека без редовно покачување на платите, во услови кога цените растат и тие не ги контролираат како тоа што го правеше СДСМ, животниот стандард ќе паѓа. Економијата нема да расте како што најавуваат и ќе создадат се потежок живот за граѓаните и работниците – додаде Филипче.

Во врска пак, со наводите, за трошењата на екс-министерката за култура, Бисера Костадиновска-Стојчевска, кои се актуелни деновиве, Филипче вели дека случајот треба да го решат институциите.