ПАЛЕВСКИ ИМАЛ ЦРНА КУТИЈА СО СНИМЕНИ ТЕЛЕФОНСКИ РАЗГOВОРИ Кешишев вели дека им пуштал снимки
Во затворот ништо не бараа од мене, само ме тепаа. А кога ме приведоа, таму ме тепаа. Кога дојде инспекторо Музафер, престанаа и почнаа да зборуваат потивко. Јас им реков дека ме гризе совеста за детето и дека сѐ ќе им кажам и без ќотек – рече Кешишев.
Обвинетиот Влатко Кешишев одговарајќи на прашања на првообвинетиот за убиствата на Вања Ѓорчевска и на Панче Жежовски, Љупчо Палевски, рече дека Палчо имал црна кутија во која чувал снимени телефонски разговори и дека им пуштил некои од нив да ги слушаат.
На денешното рочиште Кешишев се соочи со Палевски иако одговараше на неговите вкрстени прашања свртен со грб кон него.
– Во ЈО сте кажале дека поседувам некаква црна кутија. Во доказите на ОЈО тоа е хард диск тошиба на кој има телефонски разговори. Сте објасниле дека ми биле нудени пари и дека не сум ги продавал. Дали обвинителите ве прашаа каде се тие материјали, дали сум ги злоупотребувал. Дали тие материјали од црната кутија се злоупотребени за уцени, закани и за користољубие? – праша Палевски, а по приговор на Ефремов судијата не го дозволи прашањето.
Кешишев негираше дека во седиштето на Десна видел или слушнал аудиоразговори, снимени телефонски разговори.
– Дали ви е познато дека поседувам такви материјали? – праша Палевски.
– Ти ни покажа и мислам дека ни пушти еден до два разговори, не само на мене, туку и на уште неколкумина – рече Кешишев.
– Дали некој во истрагата ве праша за тие материјали – праша Палевски.
– Во ОЈО додека бев на распит тогаш кажав за таа црна кутија. Не се сеќавам на сѐ, им кажав дека има многу снимени разговори – рече Кешишев.
Кога зборуваше за кесата со моторолите рече дека прво ја носел неа, а после го зел ранецот.
-Мислам дека сите видоа на снимката дека носам хартиена кеса – рече Кешишев и додаде дека тој не ги чувал моторолите.
Палевски го праша од каде ги купил моторолите.
– Мислам дека ти ги порача, мислам преку Фејсбук. Не знам кога се купени – рече Кешишев.
Тој не знаеше да каже дали моторолите биле доставени во штабот во Кисела Вода.
Палевски побара од Кешишев да појасни како отишол кон куќата на Панче од куќата на Велибор во првиот неуспешен обид за грабнување.
-Јас не отидов. Тие тројцата отидоа, а јас останав со „кангото“ долу на патот и ги чекав. Ти ми кажа таму да чекам додека да се вратат. Чекав како што ми кажа ти, во близина на куќата на Панче, ама на главниот пат. Јас не знам каде е куќата. Ти ми кажа каде да чекам, на банкината до главниот пат – рече Кешишев.
– Манев тврди дека биле да ја извидат позицијата на куќата, а вие тврдите дека било обид за грабнување, иако не сте биле присутен. Во колку часот се паркиравте на местото во тој неуспешен обид за киднапирање на Панче? – праша Палевски.
– Час не знам. Се гледа на видеото дека тие тргнуваат пеш надолу, а јас одам по „кангуто“ – рече Кешишев.
– На минатото рочиште сте изјавиле дека 30 минути по пристигнувањето сте разговарале во подрумот на Велибор, а потоа тројца заминале кон куќата на Панче, а вие подоцна сте се придружиле. Вкупно сте чекале 30 минути на местото. Тоа значи дека во 22 часот сте пристигнале, а во 23 часот, тројцата обвинети се вратиле, по што Палевски рекол ништо не бива и сте заминале во Скопје. Прашањето е дали од тоа место каде што чекавте јас и вие заминавме за Скопје? – праша Палевски.
-Да, заминавме за Скопје двајцата – рече Кешишев.
– Ако сме заминале за Скопје во 23 часот, како во 00.03 на видеото сѐ уште сте во Велес, „кангуто“ е во Велес и во 00.03 се вади ранецот од „кангуто“ и се внесува во куќата на Велибор? – праша Палевски.
– Не знам колку беше часот, не носев телефон – рече Кешишев.
– Кога полневте гориво со Манев, пред или после обидот за грабнување на Панче? – праша Палевски.
– Не се сеќавам, мисам дека пред – рече Кешишев
– Сте кажале дека сте дошле следното рано наутро кога наводно јас и вие сме дошле на црниот паркинг, како што го нарекувате. Ве прашале каде сум заминал после пристигнување на паркингот, сте одговориле дека јас сум заминал кај Панче – праша Палевски.
– Да, излезе од „кангуто“, како што сте се договориле. Стигнавме на паркингот околу 7 или 7.30. Тоа утро не бевме пред куќата на Велибор. Само што стигнавме ти ми рече да седам во „кангуто“ и да чекам, а ти излезе и тргна пеш. Не сме биле кај Манев.
– Сте биле прашани од ЈО дали видеата од дворот на Манев се вистинити и вие сте рекле да. Пред малку потврдивте дека во 6.30 и во 7.10 часот не сме биле пред куќата на Манев, туку сме пред паркингот. Тоа значи дека видеото во кое се гледа „рено кангу“ пред куќата на Манев тоа утро е фалсификат. Колку време се задржавме на паркингот? Како е можно на видеото на ОЈО „реното кангу“ да е пред куќата на Велибор, а ние во исто време да бидеме на паркингот покрај пругата? – праша Палевски.
– Ако добро се сеќавам, од Скопје стигнавме таму и го паркирав „кангуто“ на паркингот. Палчо тргна пеш – рече Кешишев.
– Дали ќе се согласите со мене дека видеото на ОЈО не е точно во делот на инсерти во 6.35 во 7, 7.10, затоа што „кангуто“ во тие моменти не е таму, не е пред куќата на Манев? – праша Палевски.
– Јас го кажав целиот настан два пати. Ќе повторам. Стигнавме на паркинг, јас останав во возилото – рече Кешишев.
Палевски го праша Кешишев дали го познава лицето Александар Велиновски, што Кешишев негираше.
– Да ве потсетам, тоа е лицето чии ДНК траги се најдени на телефонот за кој се тврди дека јас усм го фрлил. Како сум го фрлил, а нема ДНК од мене? – праша Палевски, а судот не го дозволи прашањето, зашто обвинетиот не е вештак.
Палевски го прашуваше Кешишев колку време изгубиле на паркингот по пристигнувањето на „цитроенот“ со тројцата осомничени и со Панче во гепекот, колку време патувале до местото Рудник, зошто патувале од црниот паркинг до хотел „Романтик“, 5 километри растојание, цели 2 часа, од 8.30, до 10.30.
-За време не можам да кажам, немав часовник ни телефон. Кога тргнавме оттаму мојата претпоставка е дека до местото кај Рудник поминаа 30 минути – рече Кешишев.
Кешишев рече дека кога пристигнал на пунктот на Македонија пат останатите тројца ги чекал во „кангуто“ над пунктот.
– За време не знам, не носев телефон. Нагласив дека тргнав од паркингот, но немав часовник за да гледам време. Кога се качи Вељо во „кангуто“, бевме до Рудник, после Велибор пак се качи во „кангуто“ со мене и возев до Скопје. Кога го оставивме „цитроенот“ во Маџари, сите четворица тргнавме кон штабот, но немам ориентација за време – рече Кешишев и додаде дека во штабот не забележал колку е часот.
– Кажавте дека во штабот сте дознале дека Панче е грабнат и убиен. Кој и што ви кажа во штабот во врска со Панче? – праша Палевски.
– Помеѓу вас разговаравте – рече Кешишев.
Тој рече дека состанокот во штабот траел околу 10 до 15 минути, дека не се сеќава дали истата таа ноќ на 22 ноември 2023 година, по тој состанок во канцеларијата, Велибор и Боре дошле во партијата. Кешишев рече дека на денот на убиството на Панче, Палевски не го носел во месноста Дупки, како што тврдеше Манев пред судот.
– Сте кажале дека сум бришел кваки, волан и менувач со WD-40, дали знаете зошто се користи WD-40? Дали се прска или се брише со WD-40? – праша Палевски.
– Не, после ти ми објасни зошто се користи. Палевски ми кажа дeка е средство за чистење на траги, на отпечатоци – рече Кешишев.
– Кажавте дека никогаш не е планирано убивање, туку само грабнување. Носевте ли храна и вода за грабнатите за да ги чувате? – праша Палевски.
– Јас не сум носел ништо такво – одговори Кешишев.
– Велибор Манев тврди дека имало три обиди за грабнување на малолетната Вања, а вие тврдите два – рече Палевски.
– Бевме два пати. Првиот пат беше неуспешен, а вториот пат се случи тоа што се случи – рече Кешишев.
– Во судот беше кажано дека Вања е грабната по грешка. Дали некој некогаш ве прашал, а вие сте одговориле дека Вања е грабната по грешка? – праша Палевски.
– Не се сеќавам. Можно е. Не верувам – рече Кешишев.
Палевски рече дека ОЈО утврдило дека трагите од пневматици на местото на настанот не се од „кангуто“, ниту земјата пронајдена во возилото е од местото на настанот Дупки.
-Таму беа и „кангуто“ и „цитроенот“. Прво одеше „кангуто“, а позади беше „цитроенот“. За земјата, не сум вештак – одговори Кешишев.
– Сте кажале дека сум ги избришал трагите со лопатата со WD-40. Прашувам дали ви е познато дека земјата на лопатата не соодвестува со земјата подигната од дупката со убиеното дете, вештачено од МВР форензика – рече Палевски
– Јас не знам. Палчо ги избриша лопатите, а јас ги фрлив – рече Кешишев.
– Во судот беше кажано дека прво е пукано во Вања, а потоа е копана дупката. Вие на минатото рочиште сте рекле дека сте виделе како копаат дупка, па се слуша истрелот. Дали дупката е копана пред истрелот? – праша Палевски.
– Пред истрелот – рече Кешишев.
– Дали на местото Дупки слушнавте глас од убиеното дете? – праша Палевски.
– Од никого не слушнав глас, бев далеку 20 метри – рече Кешишев.
– Дали сте виделе разговор помежу мене и убиеното дете – праша Палевски.
– Не. Видов како стоиш до отворениот багажник – рече Кешишев.
Тој негираше дека слушнал било што за Фершпед, А1, стан во Охрид, ни пред ни по убиството на Вања.
– Кога реков дека се работи за селото Бразда, реков да ме однесат таму за да го видам црниот пат и ќе се сетам на местото, не можам да утнам – рече Кешишев, на прашањето како знаел да ја однесе полицијата до местото Бразда.
– На 13.11.2023 година Манев му пратил слика со Панче и со „цитроенот“ на Боре Видевски. Дали вам ви пратил таква слика? Дали сте слушнале дека јас сум добил таква слика – праша Палевски, а Кешишев негираше.
– Ако јас сум убиецот, како е можно мене да не ми праќате такви слики од жртвите кои треба да ги убијам? – праша Палевски.
– Палевски и Вељо се договараа за сѐ и тие си знаат дали разменувале слики – рече Кешишев.
Тој рече дека не слушнал пред или после убиствата термини Страшо Гранит, ќерка на фармацевт.
– Кој конкретно и што ви кажа за убиствата во штабот додека варите кафе? – праша Палевски.
– Никој. Знам од тоа што го слушав меѓу вас. Мене никој не ми кажа, тоа беше разговор меѓу вас – рече Кешишев.
Палевски го праша дали бил тепан во полиција и во затвор.
– Да тепан сум. Во затворот ништо не бараа од мене, само ме тепаа. А кога ме приведоа, таму ме тепаа. Кога дојде инспекторо Музафер, престанаа и почнаа да зборуваат потивко. Јас им реков дека ме гризе совеста за детето и дека сѐ ќе им кажам и без ќотек – рече Кешишев.