ПАЛЧО ФРЛИЛ ЧКОРЧЕ И ГО ЗАПАЛИЛ „ЦИТРОЕНОТ“ Истрелот што го слушнал Кешишев при убиството на Панче бил потап
Палевски ми рече дека е во Турција, јас му реков дека овде врие од полиција и тој веднаш ми исклучи – рече Кешишев.
Обвинетиот Влатко Кешишев денеска во судница рече дека првообвинетиот за убиствата на Вања Ѓорчевска и на Панче Жежовски, Љупчо Палевски, го запалил „цитроенот“. Тој прво одговараше на прашања од неговиот адвокат Игор Ефремов.
– Рековте дека пола од бензинот не сте го сипале во „цитроенот“, зошто? – праша адвокатот.
– Половината ни требаше за да го запалиме возилото – рече Кешишев.
– Каде и како го запаливте? – праша адвокатот.
– На една ливада, каде што нема дрвја, за да не предизвикаме пожар. Го поливме „цитроенот“ со бензин и Палчо му фрли чкорче од кибрит и го запали – рече Кешишев.
– Дали и во околината на Рудник слушнавте истрел? – праша адвокатот.
– Да, ама звукот беше потап, за разлика од Бразда, каде беше поостар – рече Кешишев.
– Дали ви кажа Палевски во која држава ќе оди и зошто? – праша адвокатот.
– Прво ми рече дека ќе оди во Белград. После кога полицијата дојде во штабот, ми се јави кратко, рече јас сум во Турција и исклучи – рече Кешишев.
– Дали во тој момент му рековте дека има полиција има во штабот? – праша адвокатот.
– Тој ми рече дека е во Турција и јас му реков овде врие од полиција и тој веднаш ми исклучи – рече Кешишев.
– Дали имаш учествувано или си слушнал дека другите учествувале и во други грабнувања? – праша адвокатот.
– Не. А за другите, не правеле пред мене таков муабет – рече Кешишев и со ова заврши испрашувањето од неговиот адвокат Ефремов.