ПАЛАТА НА САРДИНИЈА КАКО ПОДАРОК ЗА СИНОТ Султанот од Брунеи сака да ја купи вилата на Берлускони

Султанот од Брунеи сака да ја купи вилата на Силвио Берлускони на италијанскиот остров Сардинија, објавија италијанските медиуми.

Имотот неодамна беше ставен на продажба по цена од 300-500 милиони евра од наследниците на Берлускони. Вилата Чертоза е огромна палата со градини со големина од 80 тениски игралишта, со поглед на море и со амфитеатар.

Султанот од Брунеи, Болкија (77), чие богатство се проценува на околу 30 милијарди долари, бил заинтересиран за имотот во кој престојувале влијателни државници како Џорџ Буш, Тони Блер и Владимир Путин.

Интерес за вилата изразиле и милијардери од САД и арапските земји, како и хотелски групи кои сакаат да ја претворат во луксузен ресорт.

Султанот од Брунеи, пак, ја сака како подарок за едно од неговите 10 деца, за неговиот 32-годишен син Абдул Матин, кој неодамна се ожени. Неговата венчавка траела 10 дена на брод за крстарење кој патувал низ Медитеранот и застанал на островот Сардинија.

Берлускони почина во јуни минатата година.