ПЈАСТРИ НЕПРИКОСНОВЕН ВО ХОЛАНДИЈА Мекларен доминира, Австралиецот бега кон титулата
Австралиецот доминираше во Зандворт, Норис откажа, а Верстапен и Хаџар го комплетираа подиумот.
Австралиецот Оскар Пјастри во болидот на Мекларен триумфираше на Големата награда на Холандија, што денеска се возеше на легендарната патека во Зандворт.
Со оваа победа, неговата седма сезонава и деветта во кариерата, Пјастри уште еднаш потврди дека е главен фаворит за титулата во Формула 1.
Драмата на патеката ја зголеми откажувањето на неговиот тимски колега и најсериозен конкурент за титулата, Ландо Норис, кој во 65-от круг мораше да ја прекине трката поради технички проблеми.
Публиката во Зандворт беше разочарана што домашниот херој Макс Верстапен не стигна до победата, но сепак успеа да заврши втор во болидот на Ред Бул. На големо изненадување, Французинот Исак Хаџар во Рејсинг Булс-Хонда стигна до своето прво подиумско место во кариерата, завршувајќи трет.
Со девет трки до крајот, Пјастри има сериозна предност во генералниот пласман – 309 бодови, дури 34 повеќе од Норис. Верстапен останува трет со 205 бодови.
Во конкуренција на конструктори Мекларен е убедлив лидер со 584 поени, далеку пред Ферари со 260 и Мерцедес со 248.
Следниот предизвик за возачите е веќе идниот викенд – Големата награда на Италија во Монца, каде што се очекува уште една голема битка на асфалтот.