Јовановиќ: Бројот на платежни картички покажува дека живееме во сиромаштија

Платежни картички за над 324 илјади граѓани ќе додели Владата со цел рестартирање на македонската економија. Но токму оваа бројка дава една друга слика која покажува дека за жал во нашата држава поголемиот дел живеат со помалку од 15 илјади денари месечно.

Поранешниот советник во министерството за финансии, Бранимир Јовановиќ во изјава за „Т21“ смета дека ваквата бројка е поразителна, истакнувајќи дека со оваа мерка на граѓаните им се даваат трошки и милостиња, наместо да се решат системски проблемите.

– Дефинитивно е поразителна статистиката, со тоа што мислам дека бројките се уште полоши од ова, бидејќи во оваа бројка не се влезени и пензионерите. Голем дел од пензионерите, веројатно една половина, односно 150 илјади имаат пензии кои се помали од 15 илјади денари. Официјалната стапка на сиромаштија во државата е околу 22 проценти, односно 455.000 кај нас живеат во релативна сиромаштија, а според светска банка, апсолутната сиромаштија во земјава изнесува 110.000 живеат со помалку од 40 денари на ден. Има и бројки за висина на приходи од Министерство за финансии, 50% од луѓето имаат доход под 212 евра месечно – истакна Бранимир Јовановиќ.