„ОВАА ИГРА НЕ Е НИШТО НОВО“ Лавров во бермуди и маица ја дочека веста дека е хоспитализиран (ВИДЕО)

Портпаролката на Министерството за надворешни работи на Русија, Марија Захарова, денеска на социјалните мрежи демантираше дека шефот на руската дипломатија е хоспитализиран на Бали.

Неколку светски агенции, повикувајќи се на неименувани дипломатски извори, претходно објавија дека на Лавров му била укажана лекарска помош поради проблем со срцето.

И Министерството за надворешни работи на Русија демантираше дека шефот на руската дипломатија е хоспитализиран.

Захарова напиша дека седи со Лавров и оти не верува во тоа што го чита во медиумите.

– Сергеј Викторович и јас ги читаме вестите во Индонезија и не можеме да им веруваме на нашите очи: излегува дека е хоспитализиран. Ова е, се разбира, лага – напиша Захарова на нејзиниот канал на Телеграм.

Lavrov at his hotel in Bali. Says reports about his health are a “political game” https://t.co/OddllPDgq7 pic.twitter.com/GKu0Ffo1st

— Pjotr Sauer (@PjotrSauer) November 14, 2022

На Твитер се појави видео на кое се гледа рускиот министер за надворешни работи Лавров како седи на стол на терасата на хотелот, облечен во маица и бермуди.

Запрашан за извештајот, Лавров рече дека една деценија западните новинари лажно пишувале дека рускиот претседател Владимир Путин (70) е болен.

– Ова е тип на игра што не е нова во политиката. Западните новинари треба да бидат повеќе наклонети кон вистината, да ја пишуваат вистината – рече Лавров со иронична насмевка.

Лавров рече дека западните медиуми рутински имаат делумен поглед на настаните и го игнорираат гледиштето на Русија.