📽️ ОВА Е „NEO“, РОБОТОТ КОЈ СОБИРА АЛИШТА, ЧИСТИ, ДУРИ И ТАНЦУВА Дали 20.000 долари се премногу за вашата удобност?
Норвешко-американскиот хуманоиден робот „Neo“ со AI се најавува како домашен асистент кој собира, чисти, одговара на прашања и дури танцува, но корисниците се поделени околу неговата практичност и безбедност.
Норвешко-американската технолошка компанија „1X“ го претстави новиот домашен робот со вештачка интелигенција под името „Neo“, кој од денес може да се нарача и кој, според производителот, треба да ги преземе секојдневните домашни обврски и да им овозможи на корисниците да се посветат на „она што навистина е важно“.
Роботот „Neo“ се испорачува облечен во плетена облека и заменливи чевли, а неговите способности вклучуваат собирање и диплење облека, полнење на машината за садови, одговарање на прашања, раскажување вицеви и дури танцување, што беше прикажано во промотивното видео на мрежата „X“.
Цената на роботот изнесува 20.000 долари (околу 17.200 евра) и засега се продава исклучиво на територијата на САД.
Ако „Neo“ наиде на задача што не може самостојно да ја изврши, корисникот може да активира „експертски режим“, при што вработени од компанијата „1X“ „гледаат низ очите на роботот“ и го насочуваат од далечина, додека неговата AI способност се усовршува за идните задачи.
Сепак, тестовите покажуваат дека „Neo“ сè уште не е совршен. Новинарката на „Wall Street Journal“, Џоен Стерн, која го тестираше роботот еден ден, изјави дека му се потребни речиси пет минути за да ја испразни машината за садови, а повеќе од една минута за да донесе шише со вода.
– Не е баш натчовечки, како што се тврди – оцени Стерн.
Директорот на компанијата Бернт Берних нагласува дека малите несовршености се дел од концептот.
– Тоа е најкорисната форма на несмасност. Ако „Neo“ само правилно ги нареди чашите во ормарот, јас ќе бидам задоволен. Целта не е совршенство, туку практичност – вели Берних.
Берних додава дека способностите на роботот брзо ќе се подобруваат преку собирање нови податоци од корисниците. Сепак, вработените во компанијата можат да имаат увид во работата на роботот, што тој го спореди со „принципот на големата сестра“.
– Сите го знаеме изразот „Големиот брат ве набљудува“, но нашиот робот функционира како „Голема сестра“ – набљудува за да помогне, не за да контролира – објаснува Берних.
Корисниците можат да го ограничат пристапот до податоците и да означат зони во домот каде „Neo“ нема дозвола да влегува. Берних потенцира дека роботот е програмиран да не подига тешки, жешки или остри предмети, а безбедносниот систем е повеќеслоен.