ОВА Е КРИВИЧНО ДЕЛО! Адвокатот Тортевски категоричен за скандалозниот извештај на професорот Ристески

Со извештајот на професорот Темелко Ристески од 2020 година е несомнено сторено кривично дело, но поголема одговорност треба да се побара од тие што го плаќале. Ова за Плусинфо го изјави адвокатот Александар Тортевски, кој дополни дека прво треба да се утврди дали Ристески е деловно способен и доколку сè е в ред, тогаш надлежните органи треба да реагираат.

Аферата околу извештајот на пензионираниот професор по право, Темелко Ристески, изби кога на социјалните медиуми беше обелоденет документот заверен во Министерството за одбрана, во кој професорот, покрај другото, ги навел и неговите активности на Фејсбук, кои се однесуваат на неговата поддршка до коалицијата „Можеме“, предводена од владеачкиот СДСМ, пред тогашните предвремени парламентарни избори. Во извештајот, Ристески наведува дека активно ја следел изборната кампања, дека напишал 10 објави на Фејсбук за поддршка на коалицијата „Можеме“, дека напишал 2 агитациони писма за поддршка на коалицијата кои биле објавени на фејсбук-страницата на Партијата на пензионерите, а и дека имал и телефонски и лични контакти со претседателот на истата партија, за поддршка на владејачката коалиција.

– СЈО своевремено покрена постапка против лице кое примало плата од Централен регистар, а всушност работело во Центарот за комуникација на ВМРО-ДПМНЕ и агитирало за партијата. Според мене, нема разлика во двата случаја – додава Тортевски.

Во времето кога спорниот извештај бил поднесен, министерка за одбрана беше Радмила Шеќеринска. Во телефонски разговор, таа ни посочи дека не знае ништо за случајот и дека кога таа била министерка сите договори биле во надлежност на државниот секретар во Министерството.

Од Министерството, пак, ни одговорија дека лицето за кое прашуваме било ангажирано како експерт и со точно наведени конкретни задачи, кои во никој случај не излегуваат од рамката на неговата професионалност како експерт по право.

„Согласно договорот, ова лице е ангажирано за советодавни задачи стриктно поврзани со стратешките документи во одбраната, учествувал во изработка на документи продуцирани од експертски работни групи и законски решенија во областа на одбраната. Во таа насока, при исплатата на дефинираниот хонорар, министерството се водело исклучиво согласно извршените задачи кои се наведени во договорот и ништо повеќе од тоа. Договорот не опфаќа ниту една од одредбите наведени во извештајот на експертот кои се однесуваат на неговите лични убедувања “, се вели во одговорот испратен од Министерството за одбрана.

Ристески ја потврди автентичноста на испратениот извештај, но демантираше дека тој бил платен од Министерството за одбрана за неговата агитација на социјалните мрежи во пресрет на предвремените парламентарни избори.