„ОВА Е БЕБЕТО ШТО ИЗЛЕЗЕ ОД МОЈАТА УТРОБА“ Селма Хајек се пофали со насловната страница на својата единствена ќерка
Деветнаесетгодишната Валентина Палома Пино ја красеше насловната страница на престижното британско списание „Татлер“, а познатата актерка со емотивна објава покажа колку е горда на својата единствена ќерка.
Холивудската актерка Селма Хајек не можеше да ја скрие гордоста откако нејзината 19-годишна ќерка Валентина Палома Пино се најде на насловната страница на декемвриското издание на британското списание „Татлер“.
Младата наследничка позира во креации на познати луксузни модни куќи, меѓу кои „Сен Лоран“, „Александер Меквин“ и „Баленсијага“. На насловната страница носи тесен златен фустан од „Гучи“, а друштво ѝ прави англиската рагби-ѕвезда Хенри Полок.
Двајцата се најдоа на врвот на годишната листа „Little Black Book“ на „Татлер“, која ги издвојува 200-те најпосакувани, највлијателни и најинтересни млади самци од високото општество. На листата се наоѓаат млади припадници на аристократијата, спортисти, уметници и успешни претприемачи.
Познатата 60-годишна актерка го прослави успехот на својата единствена ќерка со емотивна објава на Инстаграм.
– Дами и господа, ова е бебето што излезе од мојата утроба! – напиша Хајек, споделувајќи фотографии од Валентина. Актерката ја опиша ќерка си како прекрасна божица, но истакна дека најмногу ја радуваат нејзиниот внимателен однос кон другите, грижливоста и прекрасната смисла за хумор.
Валентина е родена во септември 2007 година, во бракот на Селма Хајек со францускиот милијардер Франсоа-Анри Пино, кој е на чело на луксузната групација „Керинг“, во чија сопственост се некои од најпознатите светски модни брендови.
View this post on Instagram
Иако порасна пред очите на јавноста и често ја придружуваше мајка си на престижни настани, Валентина се обидува да ја зачува приватноста. Со Хајек се појави и на доделувањето на Оскарите во 2023 година, а во 2022 година заедно ја красеа насловната страница на мексиканското издание на „Вог“.
Наместо да студира во САД, Валентина се одлучи за Лондон, каде што е втора година на студиите по дигитални медиуми и култура на „Кингс колеџ“. Во интервју за „Татлер“ открила дека брзо се вљубила во британскиот начин на живот, хуморот и културата на дружење во пабовите.
И покрај тоа што нејзиното семејство е тесно поврзано со светот на високата мода, младата Валентина признава дека модните ревии понекогаш ѝ создаваат непријатност. Затоа најмногу сака да присуствува на нив во друштво на семејството, особено на својата постара полусестра Матилда Пино, која е многу послободна во друштво.
А има и еден сосема обичен проблем, кој веројатно би го разбрале многу девојки: никако не успева да го пронајде совршениот пар фармерки. Иако има пристап до креации на најпознатите модни куќи во светот, Валентина вели дека сè уште не ги нашла фармерките што совршено ѝ одговараат.