ОСТРАНЕТИ СЕ ДРВАТА ШТО ГО ПОПРЕЧУВАА ТЕКОТ НА ПЕНА Нема опасност од излевање на водата кај Сараќино

Како резултат на обилните врнежи од дожд коишто го зафатија подрачјето на територија на Македонија уште на 28 март, добиена е пријава за попречени, нанесени, дрва во речното корито на река Пена во атарот на село Сараќино, општина Тетово, информира ЦУК.

„Поради надојдената вода на река Пена, нанесените дрвата претставуваa природна препрека за нормално течење на водата во речното корито и на одредени места се случуваше заезерување во речното корито и имаше потецијална опасност реката да се излее надвор од речното корито, а со тоа и да дојде поплавување на куќите и земјоделското земјиште во атар село Сараќино, Општина Тетово.

Секторот за операции и координација на ЦУК за настанатата состојба преку писмено известување ги извести Општина Тетово, Општина Желино, ЈКП Тетово, АД Водостопанство, Министерство за земјоделство шумарство и водостопанство и Дирекцијата за заштита и спасување за преземање на мерки и активности за отстранување на попречените дрвја во речното корито.

Од страна на локалната самоуправа на Тетово со помош механизација попречените дрва се отстранети од речното корито на Пена и е надмината опасноста од излевање на водата од речното корито кај село Сараќино“, се наведува во соопштението.