ОСТРА РЕАКЦИЈА ЗА „СЕВЕРНОМАКЕДОНЦИ“ ВО ПОПИСОТ ВО АЛБАНИЈА Резултатите не ја отсликуваат реалната бројка на етнички Македонци во земјата

Министерството за надворешни работи на Република Северна Македонија со сериозна загриженост ги нотира објавените прелиминарни резултати од Пописот одржан во Република Албанија во 2023 година.

„Техничките нерегуларности во начинот на реализација на истиот, на кои континуирано укажуваа македонските здруженија во Република Албанија во пресрет на Пописот, но и во текот на неговата реализација резултираа со објава на прелиминарни податоци кои што за жал не ја отсликуваат соодветно реалната бројка на етнички Македонци во земјата“, се наведува во реакцијата на МНР.

Дополнително, Министерството изразува незадоволство и остро реагира на употребата на терминот „северномакедонци“ и употребата на име на земја како супститут за етничка заедница.

Министерството соопшти дека ќе го повика амбасадорот Данчо Марковски на итни консултации во насока на прецизирање на недостатоците и недоследностите во овој процес, разгледување на можностите за соодветна корекција на направените пропусти и изнаоѓање најадекватни начини за понатамошно заедничко дејствување и унапредување на билатералните односи со Република Албанија.

„Министерството во претстојниот период интензивно ќе соработува со надлежните претставници на властите во Република Албанија и со претставниците на Македонската заедница во Република Албанија во насока на нивна културна и социјална промоција во рамките на албанското општество, што за жал и повеќе од очигледно било целосно запоставено од страна на претходната политичка гарнитура во нашата држава“, се додава во реакцијата.

Од МНР порачуваат дека сите отворени прашања меѓу две соседни држави треба да се решаваат преку дијалог и меѓусебно разбирање и почитување на правилата, принципите и вредностите на меѓународниот правен поредок.