Османи со австрискиот амбасадор: На располагање ви се нашите безбедносни структури
Министерот за надворешни работи, Бујар Османи денеска имаше средба со Георг Вуцас, вонреден и ополномоштен амбасадор на Австрија во С. Македонија, по последните трагични случувања и убиства во Виена.
Османи, како што соопшти неговиот Кабинет, посочи дека веќе во неколку наврати и на повеќе нивоа, највисоките претставници на земјава изразија сериозна и бескомпромисна осуда на овој терористички чин. Тој напомена и дека за радикалниот ислам и за сите форми на екстремизам нема толеранција и оправдување.
– Силно го осудуваме синоќешниот терористички напад во Виена и ја споделуваме болката со нашите австриски и европски пријатели. Тероризмот не признава ниту нација, ниту религија, ниту потекло, и цврсто стоиме против сите негови форми, без разлика од кого е сторен. Сега е најважно да се покаже солидарност и координација во заедничкиот одговор против ваквото зло, кое штети на толеранцијата меѓу религиите и нациите, и се заканува да создаде раздор помеѓу Европа и други делови од светот. Одговорот треба да биде едногласен и одлучен, солидарноста на Европа е клучна во овие моменти на заштитата на нашите демократии – истакна Османи.
На средбата Османи изрази целосна подготвеност на нашите безбедносни структури за активна соработка со безбедносните органи на Австрија и Европол.
– Со оглед на појавените информации за можните двојни државјанства на некои од учесниците, добив потврда од нашите безбедносни структури дека се во целост ставени на располагање за потребите на органите на прогон на Австрија, како и на Европол. Северна Македонија ќе се залага безрезервно во справувањето и сузбивањето на ваквите и било какви други видови на тероризам и насилство врз невини луѓе, кои ја загрозуваат стабилноста и демократијата на Европа, и ги нарушуваат основните нејзини вредности и принципи – рече Османи и упати уверување за целосна соработка и отворена поддршка од земјава за расчистување на целиот случај и изведување на напаѓачите пред судот на правдата.