Оштетените штедачи од Еуростандард бараа пратениците да го изгласаат законот за да си ги земат парите

Оштетените депоненти, оние кои останаа необештетени во целост како физички лица и целосно необештетените фирми, се оставени на немилост на банкарскиот систем и државата да се снаоѓаат како знаат и умеат. Опљачкани од системот за којшто и ден денес се тврди дека е стабилен и сигурен, за да повторно бидат спокојни штедачите и во другите банки за кои таа иста Народна Банка е должна
да ги заштити, велат од Здружение на оштетени штедачи на Еуростандард банка.

– Борбата на оние коишто се ограбени тукушто започна. Ни криви ни должни се исправени пред неправдата, со нарушени здравје и мир, во агонија и со непреспиени ноќи. Немаат што повеќе да загубат бидејќи пропадната банка и државната институција којашто го дозволила направениот криминал во банката им одземаа се што имаа. На потег се народните избраници – пратеници во Собранието како законодавен дом да го изгласаат предлог законот за целосно парично обештетување на физичките и правни лица депоненти на Еуростандард банка, а потоа државата да
наплати од стечајната маса – велат од Здружението.

Од Здружението на оштетените штедачи на Еуростандард банка велат дека поднеле иницијатива за носење на закон и барање до политичките партии во Собранието да го изгласаат истиот во најскоро можно време.

– На тој начин пратениците ќе покажат дека се грижат за своите сограѓани и фирми кои ги плаќаат да ги заштитат од злоупотреби и неправди и дека работат во нивни интерес односно да го заштитат обичниот народ од грабежот на големите капиталисти – велат од Здружението.

Од таму додаваат дека за тие за  кои во наредниот период ќе се докаже од истражните органи дека се виновни и одговорни за пропаѓањето на банката било да биле на одговорни позиции во Еуростандард банка или надвор од неа, треба да одговараат пред лицето на правдата не само кривично туку и материјално преку замрзнување на нивниот личен имот и имотот на нивните семејства за покривање на криминалот што го направиле во пропадната Еуростандард банка.