ОРУЖАНА ПРЕСМЕТКА ВО ХАНИОТИ Повредени тројца Бугари

Тројца бугарски државјани се повредени во пресметка што се случила ноќеска во познатото грчко летувалиште Ханиоти на Халкидики.

Група бугарски државјани нападнале сопственик на кафеана во Ханиоти и сонародник, удирајќи ги со тупаници и клоци по лицето и телото. При пресметката одекнале пет-шест истрели, по што гостите почнале да бегаат од локалот каде имало со жива музика, пишуваат грчките медиуми. Волонтерот што прв стасал да помогне сведочи дека бил употребен и пепер спреј.

Како што пренесуваат грчките медиуми, еден маж е ранет од огнено оружје во градниот кош, друг со нож, а трет се здобил со повреди од тепање. Повредените со возило на Брза помош од Ханиоти биле пренесени во Здравствениот дом Касандриа и во болницата во Полигирос.

Медиумите шпекулираат дека во пресметката е вмешана бугарската мафија.

Дописничката на МИА од Атина јави дека пет лица се уапсени и се трага по уште едно лице, а повредени се тројца во пукање во кафуле на плажа во Ханиоти на Халкидики во кое, според грчките медиуми, учествувале бугарски државјани, а не е исклучена веројатноста да се работи за мафијашка пресметка.

Инцидентот се случил доцна синоќа кусо пред полноќ додека во барот се одржувала музичка вечер и присутни биле и семејства со деца, а причините за пукањето засега се непознати.

Според државната телевизија ЕРТ инцидентот бил помеѓу сопственикот на кафулето и неколку лица, кои почнале да пукаат со огнено оружје.

Се трага по лицето што пукало.