ОРУЖЈЕТО СО КОЕ СЕ УБИЕНИ ВАЊА И ПАНЧЕ НЕ Е НАЈДЕНО Не е најдена комуникација меѓу Палевски и таткото на Вања
„Кое е сомневањето дека јас сум организатор?“ го праша Палевски началникот Димовски, на што овој одговори: „Ние не тврдиме, еве, на судење сме“.
Началникот Дејан Димовски одговараше на вкрстено испрашување од бранителите на обвинетите за убиствата на Вања Ѓорчевска и на Панче Жежовски.
– Ние знаевме дека девојчето е исчезнато, но и мајката на Фејсбук имаше напишано дека е грабнато, па смени. Во почетокот немаше индиции дека девојчето е киднапирано – рече началникот Димовски.
На прашањето од бранителот на Александар Ѓорчевски, Владимир Туфегџиќ, зошто во исказот на началникот доминира Александар и од каде извлекол заклучок дека девојчето избегало за да ги казни родителите, Димовски одговори:
– Во тие разговори ние ги соголевме во однос на нивниот социјален, интимен живот, на прашањата дали порано имало нелогични и сомнитени однесувања на Вања добивме информација дека еднаш Вања се сечела, се обидела да се повреди со цврст предмет, имала ситуација со мајката и со таткото, па ѝ се налутила на мајката и живеела со таткото, па се налутила со таткото и се вратила. Девојчето Миња рече дека Вања се избола со предмет, што мајката го потврди. Си претпоставив дека Вања можеби сакала да ги смири родителите, па избегала.
Димовски рече дека стекнал впечаток дека се работи за грижливи родители.
– На прашањето на која возраст било лицето од странство за кое презеле мерки, Димовски рече:
– Мајката и таткото ми кажаа за тој дечко, мајката рече дека и таа разговарала со него. Еднаш се скарале за нешто, Вања му се налутила затоа што тој имал друга девојка во Шведска. И нејзините другарки ни потврдија за тој дечко. Кога видовме дека на профилот има знаме од ИСИС, нам ни се вклучи друг аларм. Тоа беше млад човек, 18 или 20 години.
Адвокатот Туфегџиќ додаде дека момчето од Шведска имало 14 години.
Полицијата не истражувала поврзаност на Вања со ИСИС.
„Дали сте сигурни дека Александар ви ги пратил сите снимки до кои дошол?“ – праша адвокатот Туфегџиќ.
„Од каде да знам дали ги пратил сите снимки“ – рече началникот.
„Имавте ли сознанија дека Александар пред да ги прати тие снимки, заедно со Гоце веќе од Сејф сити по пријателски врски побарале и добиле информација за движењето на ‘цитроенот’?“ – праша Туфегџиќ.
„Не“ – рече началникот Димовски.
Тој дообјасни дека немало ниеден запис од ниту еден датум на камерата што била откриена во бутка спроти зградата во која живеела Вања.
„Кажавте за избришана порака во Вибер група од Александар, дадовте претпоставка дека Александар ја пратил по грешка, па добивте ли сознанија дека пораката е до родител Бојана со која Александар комуницирал и одговарал на нејзини прашања?“ – праша адвокатот Туфегџиќ.
„Не знам за Бојана, го прашавме за пораката, рече дека е испратена по грешка“ – рече Димовски.
„Дали се лични претпоставките дека Александар е инволвиран и нема разумни образложенија зошто е вмешан?“ – праша Туфегџиќ.
„Сомневањата кон него се откако Велибор и Боре ни кажаа дека таткото е инволвиран“ – рече Димовски.
Туфегџиќ рече дека Александар не излегувал од возилото на локациите додека ја барале Вања затоа што ги следел упатствата на помошникот началник Музафер Каришиќ и имал улога да пушта кратки и долги светла за да помогне во потрагата.
Адвокатот на Боре Видевски го праша началникот Димовски дали кога Боре им кажал дека Александар давал информации се гледало дека бил тепан?
„Не. Седеше на столче додека зборуваше“ – рече Димовски.
Адвокатот на Љупчо Палевски го праша Димовски дали проверил дали Палчо има дозвола за оружје, што началникот потврди. Димовски рече дека оружјето не е пронајдено, дека не знае со кој калибар биле куршумите, дека после една недела не знае дали има ефект да се зема парафинска ракавица, како и дека не се сеќава дали некој од обвинетите има дозвола за оружје.
По вкрстеното, следуваше директно испрашување на началникот Димовски од страна на адвокатот Туфегџиќ, кој е бранител на таткото Александар.
„Дали применивте физичка сила кон Александар?“ – праша Туфегџиќ.
„Не“ – рече Димовски.
И Палевски го испрашуваше началникот Димовски. Тој покажа фотодокументација од комуникација помеѓу инспекторот и Александар.
Димовски рече дека на 2 декември 2023 година Александар му пратил слика од „цитроен“, дека вечерта бил уапсен Велибор Манев и бил донесен во полициската станица Пролет да биде испрашан.
– Манев рече дека утрото, откако спиеле во партијата, станале во 5.30 часот. Кешишев отишол да земе бензин од „Макпетрол“ пешки, а потоа сите четворица сте отишле во Радишани, каде „цитроенот“ бил препаркиран, оти бил оставен кај партијата, но некој го препаркирал во Радишани, па отишле по него. Од таму, кон Центар – му рече Димовски на Палевски.
– Ги прашавме „Како знаевте дека девојчето ќе биде само?“ Велибор рече дека Палчо ја имал информацијата од таткото – додаде Димовски.
Палевски, цитирајќи го исказот на Велибор Манев од 3 декември 2023 година даден во Јавното обвинителство, рече дека тој рекол дека ги познавал родителите, но дека не комуницирал со нив.
„Дали во полициската встаница Велибор го спомена името Александар“ – праша Палевски.
„Не го споменуваше по име, велеше таткото“ – рече Димовски.
Димовски рече дека не е најдена комуникација меѓу Александар и Палчо.
„Прашавте ли кога е копана дупката за Вања?“ – праша Палевски.
„Да, еднаш беше дека е при убиството, а една варијанта, искажана пред колегите, беше дека е од претходниот ден“ – рече Димовски.
„Дали ви беше познато дека во Велес е констатирано дека три лица се учесници во грабнувањето?“ – праша Палвески.
„Не се сеќавам“ – одговори Димовски.
„Дали мене ме видовте на некоја камера?“ – праша Палевски.
„Да, ве има на неколку локации во Скопје“ – одговори началникот Димовски, а на дополнително прашање дали го видел Палевски во возило заедно со останатите обвинети, сведокот рече дека на камерите се гледаат само возачот и совозачот, и не се гледа дали позади седи некој.
„Дали утврдивте кога осомничените возила по убиствата на Панче влегле во Скопје?“ – праша Палевски.
„’Цитроенот’ три пати е виден во Скопје, на 24, 25 и 27 наоемри 2023 година, а „кангуто“ го има во Скопје“ – рече Димовски.
„Дали се сомневавте дека јас бегам, дали знаевте каде престојував во Белград? – праша Палевски.
„За вас ви кажав како дознавме, кога сѐ беше завршено“ – рече Димовски.
„Дали се покажа дека пораката од Александар за ‘цитроенот’ е точна и дали таа порака е причина за сомневањето за Александар?“ – праша Палевски.
„Да“ – рече Димовски.
„Кое е сомневањето дека јас сум организатор?“ – праша Палевски.
„Ние не тврдиме, еве, на судење сме“ – рече Димовски.
„Се појави ли барање за откуп? Имаше ли информација за направен обид за барање откуп?“ – праша Палевски.
„Не“ – одговори Димовски.