ЃОРГИЕВ СМЕТА ДЕКА КОМИСИЈАТА ЌЕ БИДЕ ПОЛИТИЧКИ ЗЛОУПОТРЕБУВАНА Тоа би направило уште поголем јаз меѓу двете држави

Премиерот Христијан Мицкоски вчера најави дека наскоро ќе биде променет составот на македонската страна во Заедничката македонско-бугарска мултидисциплинарна експертска комисија за историски и образовни прашања.

Според него, актуелната мешовита комисија не ги оправдала очекувањата и не била заштитник на националните интереси на македонскиот народ.

Академик д-р Драги Ѓоргиев, член на МАНУ и професор на Институтот за национална историја (ИНИ) на УКИМ, за порталот Локално вели дека на политичко ниво се заострени односите и во овој случај тоа многу силно ќе се отслика и во самата Комисија.

– Лично мислам дека нема да бидат во полза на решавање на ситуацијата со оглед на тоа што како се сфаќа работата на Комисијата, односно дека тоа е условно речено војна меѓу Бугарија и Македонија за националниот идентитет. Зависи и на кое ниво ќе биде подигната или третирана работата на Комисијата, но мислам дека ќе биде политички злоупотребувана – рече Ѓоргиев и додаде дека тоа не е суштината на оваа комисија, но дека таквото сфаќање ќе направи уште поголем јаз меѓу двете држави.

Заедничката македонско-бугарска комисија за историски и образовни прашања беше формирана како резултат на Договорот за добрососедство меѓу Северна Македонија и Бугарија потпишан на 1 август 2017 година.