Ѓоргиев: Изјавите на Заев нема да им ги врзат рацете на историчарите

Евроинтеграциите на македонската нација не смее да се условуваат со ултимативно прифаќање на „историски вистини“ од други национални историографии. Историјата и нејзината интерпретација не смее да се доведуваат во врска со потребите на политиката, ниту на било каков начин да се условени од политичките влијанија, што е во целосна спротивност со европските демократски принципи, порачува Институтот за национална историја.

Од Институтот реагираат преку соопштение на актуелната состојба во која, како што велат, цела една нација и историска наука се квалификуваат како фалсификаторство и се бара целосна ревизија на историјата на македонскиот народ и нација.

Драги Ѓоргиев, предводникот на македонските историчари во мешовитата комисија со Бугарија, вели дека позициите на премиерот Зоран Заев нема да им наштетат и дека историските факти се над индивидуалните ставови на политичарите.

– Ставовите на премиерот нема да ни ги врзат рацете и да не стават во подредена положба – изјави тој за телевизија Алфа.