ОРБАН МИ КАЖА ДЕКА НА 9 МАЈ ЌЕ ЗАВРШИ ВОЈНАТА Папата открива што зборувал со унгарскиот премиер
Орбан, кога го сретнав, ми рече дека Русите имаат план, дека сè ќе биде готово на 9 мај. Тоа би ја објаснило и стапката на ескалација деновиве. Затоа што сега не е само Донбас, тоа се Крим, Одеса, заземањето на црноморското пристаниште Украина, тоа е сè, рече папата во интервју за „Кориере дела сера“.
Папата Франциско изјави дека унгарскиот премиер Виктор Орбан му рекол дека Владимир Путин планира да стави крај на окупацијата на Украина на 9 мај, кога Русија го одбележува Денот на победата над фашизмот во Втората светска војна, јавува Си-Ен-Ен. Овој разговор се случил при нивната средба кон крајот на минатиот месец, пренесува Н1.
– Орбан, кога го сретнав, ми рече дека Русите имаат план, дека сè ќе биде готово на 9 мај. Тоа би ја објаснило и стапката на ескалација деновиве. Затоа што сега не е само Донбас, тоа се Крим, Одеса, заземањето на црноморското пристаниште Украина, тоа е сè – рече папата во интервју за „Кориере дела сера“.
– Јас сум песимист, но мораме да ги преземеме сите можни чекори за да ја запреме војната-додаде поглаварот на Римокатоличката црква.
Тој повтори дека е подготвен да отпатува во Москва и да се сретне со Путин, споредувајќи ја војната во Украина со геноцидот во Руанда.
– Сè уште не добивме одговор и продолжуваме да инсистираме, иако се плашам дека Путин не може и не сака да ја имаме таа средба сега. Но, толкава бруталност, како да ја спречиме? Пред 25 години го доживеавме истото со Руанда-рече папата.
Тој додаде дека засега нема да патува во Киев, туку дека ќе испрати свој претставник.
– Прво треба да одам во Москва, прво да се сретнам со Путин. Но, јас сум и свештеник, што да правам? Ќе направам сè што можам. Ако Путин ми ја отвори вратата – рече папата.
Западните власти веруваат, како што претходно денеска објави Си-Ен-Ен, дека Путин би можел формално да ѝ објави војна на Украина на 9 мај, што ќе му овозможи целосно да ги мобилизира резервните сили и да регрутира резервисти.