Ѓорѓиевски: Зоран и Вице Заев со признанието на Боки 13 си купија билет за Идризово

Очекуваме Јавното обвинителство веднаш да го повика Заев и да отвори истрага против него. Во спротивно јасно излегува на површина дека ЈО е на тастер токму од Зоран Заев. ЈО и сите кои сега не смеат да отворат постапка против Заев, иако за тоа има искази со воспоставување на правната држава во Република Македонија ќе треба да се соочат со аргуменитите дека го прикривале „Рекет“, предупреди денеска на прес-конференција Орце Ѓорѓиевски, член на ИК на ВМРО-ДПМНЕ.

Според него, во нормална правна држава после признанието на главниот осуден во „Рекет“, дека парите завршиле кај Зоран Заев и Вице Заев, денес тие требаше да бидат со лисици на рацете поради сомнение за сторен криминал. Со ова Зоран и Вице Заев си купија директен билет за во Идризово. Нема криминал во оваа држава, а да не се спомнува името на овие двајца, смета Ѓорѓиевски.

– Јавното обвинителство молчи и не се осмели да ги викне браќата Заеви ниту на разговор. Ова е втор пат откако сега осудениот експлицитно го посочува Зоран Заев, а ЈО воопшто не се интересира за тоа. Зоран и Вице Заев вчера во судот беа посочени како лица кај кои завршиле пари од „Рекет“, но Зоран Заев е белата мечка за кого ЈО не смее да отвори постапка, иако сите индиции водат директно до него – рече Ѓорѓиевски.

Тој додава дека Боки 13 е лицето кое ја носело торбата полна со пари и тој знае каде ја однел.

– Кога тој ги посочува Заеви, како крајна дестинација за изрекетираните милиони, тогаш тоа би требало да биде доволно силен аргумент Зоран Заев лично да биде повикан во ЈО да даде исказ, и истовремено да му се одземат уредите за електронска комуникација со цел нивно вештачење. ЈО со своето неделување само потврдува дека Зоран Заев не е чист и дека нешто се крие – додаде Ѓорѓиевски.