ОПШТИНИТЕ ЌЕ ИМААТ ЕКСПЕРТИ И ДИГИТАЛНА ПЛАТФОРМА НА РАСПОЛАГАЊЕ Ресурсниот центар ќе биде двигател на локалниот развој

Министерот за локална самоуправа Златко Перински денеска пред медиумите го претстави новиот концепт за институционализирана поддршка на општините – воспоставување на Ресурсен центар кој треба да обезбеди долгорочна, стручна и одржлива помош за локалната самоуправа во Македонија.

– Во изминатата година Министерството ја оправда својата позиција како вистински партнер на секоја општина и двигател на рамномерниот регионален развој. Тоа резултираше со зајакнување на политичкиот дијалог меѓу централната и локалната власт, а доказ се иницијативите што Владата ги спроведе за поддршка на општините – изјави Перински.

Тој нагласи дека низ директни посети и теренски проценки е утврдено дека општините се соочуваат со сериозни предизвици – недостаток на административни капацитети, ограничени можности за економски развој и недоволно развиена инфраструктура, што директно влијае врз квалитетот на живот на граѓаните. Како итна мерка, беа реализирани два јавни повика за инфраструктурни проекти, но останува предизвикот со слабата подготвеност на општините за аплицирање на проекти и обезбедување средства.

– За да се одговори на овој децениски проблем, потребен е систематизиран пристап и кохерентна поддршка. Токму тоа ќе го понуди новиот Ресурсен центар – институционализиран механизам кој ќе ги зајакне капацитетите на општините и ќе доведе до подобри локални услуги – рече министерот.

До април 2026 година се предвидени неколку подготвителни активности: создавање ростер на експерти достапни за општините, подготовка на прирачник за идни градоначалници, насоки за имплементација на ревизорските препораки, изработка на дигитална платформа за брза поддршка, како и поттикнување на меѓуопштинска соработка.

Ресурсниот центар ќе биде продолжение и институционализација на осумгодишниот проект „Одржлив и инклузивен рамномерен регионален развој“, поддржан од Владата на Швајцарија. Перински изрази благодарност кон Швајцарската амбасада за континуираната поддршка, а ја истакна и соработката со Делегацијата на ЕУ во Македонија преку проектот „ЕУ за општините“, како и со УНДП, што ќе придонесе за дополнителна одржливост.

– Уверен сум дека со овој ресурсен центар ќе изградиме посилна локална самоуправа, ќе обезбедиме порамномерен развој и ќе создадеме подобри услови за живот на граѓаните во сите делови на државата. Јас лично останувам безрезервно посветен и подготвен за нови иницијативи кои ќе направат разлика во квалитетот на животот на граѓаните – порача министерот Перински.