Општина Маврово и Ростуше ги ослободи фирмите од фирмарина за една година
Општина Маврово и Ростуше ги ослободува деловните субјекти од плаќање комунална такса за истакнување фирма за период од една година.
– По предлог на градоначалникот Медат Куртовски, Советот на Општина Маврово и Ростуше донесе одлука за ослободување од плаќање комунална такса на сите обврзници за истакнување на фирма за период од една година – информираа од Општината.
Ова се прави поради состојбата со пандемијата со ковид-19 што ги погоди сите фирми и не беа во можност нормално да функционираат, објаснуваат оттаму.
Според оваа одлука, деловните субјекти кои имаат долг за повеќе години ќе бидат ослободени од плаќање комунална такса за една година и тоа за првата неподмирена календарска година.
Оние пак кои го подмириле својот долг по основ на комунална такса за истакнување фирма заклучно со 2020 година, ќе бидат ослободени од обврската за плаќање на комунална такса за 2021 година.
На територијата на општина Маврово и Ростуше има 207 активни компании, а за 2020 година вкупното ослободување изнесува околу 788.000 денари.