ОПЕК ГО ЗГОЛЕМУВА ПРОИЗВОДСТВОТО НА НАФАТА Од април 200.000 барели дневно ќе испорачуваат на пазарот

Организацијата на земјите извознички на нафта (ОПЕК) и нивните сојузници објавија дека ќе го зголемат производството за повеќе од 200.000 барели дневно од април, што сигнализира малку побрзо темпо на нормализација на понудата.

Производството треба да се зголеми за 206.000 барели дневно од следниот месец, објавија Саудиска Арабија, Русија, Ирак, Обединетите Арапски Емирати, Кувајт, Казахстан, Алжир и Оман.

Групата осум одлучи да ја рестартира програмата за нормализација на понудата „со оглед на стабилните изгледи за светската економија и моментално здравиот однос на понудата и побарувачката на пазарот, според ниското ниво на залихи на нафта“, се вели во соопштението објавено вчера.

Анонимни извори во ОПЕК+ минатата недела посочија дека групата би можела да се врати на пазарот околу 137 илјади барели дневно и со тоа да сигнализира само постепена нормализација на понудата.

Во соопштението ОПЕК не го спомена нападот на САД и Израел врз Иран или одговорот на Иран на нападите врз американските бази во регионот на Персискиот Залив, вклучувајќи ги Обединетите Арапски Емирати и Кувајт.

Од друга страна, пазарите се плашат од блокадата на Ормутскиот теснец, низ кој минуваат 20 милиони барели нафта дневно, приближно една петтина од светските испораки. Иран во неделата изјави дека засега нема планови да го затвори теснецот, но бродарите закотвија стотици танкери во Персискиот Залив, а група осигурители објавија дека повеќе нема да ги покрива воените ризици во регионот.

Иран, исто така, снабдува нафта преку Ормутскиот теснец и произведува околу 3,3 милиони барели нафта дневно и уште 1,3 милиони барели кондензат и други течни јаглеводороди. Главен купувач на иранска нафта е Кина.

Глобалното производство на нафта на почетокот на годината изнесуваше 106,6 милиони барели дневно, според податоците од Меѓународната агенција за енергетика (ИЕА).