ЏОНИ НЕ МЕ ТУРНА ПО СКАЛИТЕ Популарната Кејт Мос сведочеше во одбрана на бившиот дечко

Јавноста со нетрпение го очекуваше сведочењето на Кејт Мос, популарен супермодел и поранешна девојка на Џони Деп, на судењето на актерот со неговата поранешна сопруга Амбер Херд. За неа многумина сметаа дека токму е клучниот сведок во процесот. Кејт на судењето сведочела преку видео-повик во корист на некогашниот партнер со кого се гледала од 1994 до 1998 година.

Судењето започна околу 14 часот по европско време, а Мос беше прва од сведоците. До ова сведочење дојде поради изјавата на Амбер Херд дека Деп наводно ја турнал познатата британска манекенка по скали кога биле на одмор на Јамајка.

– Јас и Џони излегувавме од хотелската соба. Се лизнав по скалите и си го повредив грбот. Врескав бидејќи не знаев што се случува со мене, почувствував болка, тој притрча кон мене и повика помош. Џони никогаш не ме турнал, не ме удирал или нешто слично. Потврдувам дека никогаш не ме турна по скалите – рече Кејт на прашањето за наводниот инцидент.

Сведочењето на манекенката траеше многу кратко, бидејќи требаше да се одговори само на наводите на Амбер Херд.