ОХРИД МОЖЕ ДА РАЗВИВА ЗДРАВСТВЕН ТУРИЗАМ Азески на средба со градоначалникот на Охрид

Охрид, како најголем туристички центар, има одлична соработка со Здружението на угостителството и туризмот при СКСМ и затоа ќе се вложат дополнителни напори за продлабочување на соработката во оваа област. Туризмот, во заложбите на Комората, има приоритетно место за добивање статус на извозно-ориентирана дејност, со што конкретно ќе се смени и односот на државата кон гранката која има потенцијал да направи раст. Во идниот период треба да се стави акцент и на здравствениот туризам и странските инвестиции.

Ова го констатирале на денешната средба претседателот на Стопанската комора Бранко Азески и новиот охридски градоначалник  Кирил Пецаков.

Од Комората соопштија дека тема на разговор била и децентрализацијата, потенцијалните заеднички проекти со Коморскиот инвестициски форум и со другите меѓународни организации.

„Во тој контекст, посебно се разговараше за здравствениот, алтернативниот и за спортскиот туризам, кои не можат да достигнат повисоко ниво доколку не дојде до брза реализација на инфраструктурните проекти, како што е завршувањето на изградбата на автопатското решение Кичево – Охрид и на меѓународниот магистрален пат Охрид – албанска граница“ се вели во соопштението.

– Здравствениот туризам, како гранка со која Охрид можеше да биде горд во седумдесеттите години на минатиот век, со неколку специјализирани болници, сконцентрирани на едно место, е нешто на кое треба да се работи во наредниот период, затоа што тоа, реално, може да придонесе за повеќекратни ефекти, и од здравствен и од економски аспект – заклучија Азески и Пецаков.

Во рамките на постојаните залагања за афирмирање на занаетите и за унапредување на практичните знаења и активности во рамките на средното стручно образование кај нас, Азески потсети на иницијативата за афирмирање на Длабокорезбарската школа во Охрид, која за градот може да донесе дополнителна економска придобивка, а истовремено да биде и значајна туристичка атракција.

На средбата се разговараше и за можностите за привлекување нови странски инвестиции во регионот, како и за одржување на постојните, во насока на поголема економска активност и на поголем број нови вработувања, што е дел и од активностите на Советот на странски инвеститори, кој функционира во рамките на Комората.