Огњан Циговски повреден откако паднал возејќи четирицикл во Маврово
Циговски деновиве повторно е актуелен поради изборот на претседател во Скијачката федерација на Македонија (СФМ).
Огњан Циговски, кој стопанисува со ски-центарот во Маврово, е повреден откако паднал возејќи четирицикл во зимскиот центар, соопшти МВР.
Како што е наведено во полицискиот билтен, Циговски (54) вчера околу 09.00 часот на двосед стазата во ски-центарот „Заре Лазарески“, управувајќи четирицикл, сопственост на ски-центарот, изгубил контрола и се превртел. Во незгодата, тој и сопатникот М.Д. (45) од Битола, двајцата вработени во ски-центарот, се здобиле со тешки телесни повреди, констатирани во медицински установи во Скопје. Увид на местото извршила увидна екипа од ОВР Гостивар.
Циговски деновиве повторно е актуелен поради изборот на претседател во Скијачката федерација на Македонија (СФМ). Пред два дена 16 скијачки клубови го обвинија Циговски за фалсификување на изборот на претседател на Скијачката федерација на Македонија (СФМ) и побараа сите надлежни институции да ги преиспитаат своите одлуки во врска со попречувањето на легитимниот избор на Дејан Пановски за претседател.
Клубовите наведоа дека Централниот регистар извршил упис на нелегитимното вонредно собрание и за нов претседател на Скијачката федерација на Македонија го запишал Огњан Циговски. „Ова лице e сопственик и директор на неколку коцкарници и обложувалници и нема допирна точка со спортското скијање. Но затоа пак стопанисува со ски центарот во Маврово“, наведоа 16-те скијачки клубови кои го поддржаа изборот на Пановски за претседател на СФМ.