ОДЛУКАТА НА УСТАВНИОТ СУД ЗА ПРОТОКОЛОТ СО БУГАРИЈА НЕМА ДА ВЛИЈАЕ НА ПРЕГОВАРАЧКАТА РАМКА Муцунски очекува дијалог, соработка и европско однесување од Софија

Уставниот суд е целосно независен во своето работење и треба да работи согласно Уставот и принципите за работа и да донесе одлука што мисли дека е соодветна, почитувајќи ги највисоките стандарди на нашиот правен систем, изјави министерот за надворешни работи, Тимчо Муцунски, во врска со иницијативата пред Уставен суд за оценка на уставноста на Вториот билатерален протокол со Бугарија.

Прашан што доколку Протоколот падне на Уставен и што тоа ќе значи за односите со Бугарија и со ЕУ, Муцунски рече дека каква и да биде одлуката на Судот тоа нема да влијае врз реализацијата на стратешката цел, ниту ќе влијае на каков било начин врз содржината на Преговарачката рамка со ЕУ.

– Во врска со нашите релации со ЕУ, не мислам дека самата одлука на Уставниот суд, каква и да биде, ќе влијае на тоа што го работиме во последниот период. Прво, нашата Влада докажува на дело дека е посветена кон процесот на европската интеграција и преку нашето дејствување на надворешно политички план, но и преку она што го правиме дома – рече Муцунски.

Според него, и денешното признание што го добри државата за привлекување на гринфилд инвестиции, е длабоко поврзано со коренитите реформи, кои државата ги прави и на економски план, но и во делот на доброто владеење и борбата против корупцијата.

– Од таа гледна точка не мислам дека самата одлука ќе влијае врз реализација на нашата стратешка цел, ниту ќе влијае на каков било начин врз содржината на преговарачата рамка која државата ја има со ЕУ, бидејќи самиот протокол не е формално правен дел од Преговарачката рамка – изјави Муцунски.

Во врска со тоа дали Протоколот со Бугарија може да биде прогласен за ништовен и дали може да се доведе во прашање и Договорот за добрососедство со Бугарија, Муцунски рече дека ќе се воздржи од коментар, бидејќи веќе има постапка пред Уставниот суд.

– Доколку го дадам својот став некој може да се обиде да го толкува како влијание, макар и јавно, врз работата на Уставниот суд. За нашите билатерални односи со Бугарија, не мислам дека самата постапка би требало да има какво било влијание врз односите, кои што во моментот, треба да бидеме реални, не ги живеат можеби своите најдобри денови. Јас како министер за надворешни работи, како и до овој момент, и од сега натаму ќе продолжам да повикувам на дијалог, ќе продолжам да повикувам да разговараме за големиот број на проекти што може да нè обединат – изјави Муцунски.

Според него, по одредени прашања и во последниот период сме имале позитивни исчекори, како што е Коридорот 8, кој за нас е стратешки и безбедносно и економско-политички значаен.

– Треба да продолжиме да разговараме за такви теми, да ги надминуваме недоразбирањата кои што ги имаме меѓусебе, но да очекуваме, исто така, од нашиот сосед дека ќе се однесува европски, бидејќи е земја членка на ЕУ. По однос на сите оние значајни прашања од билатералните односи ќе се однесува европски, а не антиевропски, бидејќи, за жал, реториката која што ја гледаме во последните месеци, однесувањето во европските институции, кое што го гледаме во последните месеци, не доликуваат на земја членка на ЕУ. Но, работиме и сакаме да работиме на подобрување на тие односи – изјави Муцунски.

Според него, споделуваме ист регион и сме си покажувале солидарност кога е таа потребна. Не треба да дозволуваме, како што нагласи, „да сме обременети од прашања поврзани со историја, идентитет и јазик“.

– Треба да гледаме напред кон иднината и јас како министер за надворешни работи, нашата Влада, секогаш ќе повикува на разум, на дијалог и на позитивна енергија во билатералните односи – изјави Муцунски.