Од 100 тестирани лански брисеви ниту еден немал коронавирус

Ниту еден од стоте тестирани брисеви од сезоната 2019/2020 не бил заразен со коронавирус, одговорија од Министерството за здравство на прашње на Плусинфо.

– Вкупно 100 одбрани примероци од сезоната 2019/2020 кои биле негативни на инфлуенца се тестирани и за коронавирусот. Сите тие имаат негативни резултати на коронавирусот – рекоа од Здравство.

Министерот за здравство Венко Филипе уште пролетва најави дека ќе се тестираат за присуство на коронавирус брисевите земени во сезоната на грип. Последнава сезона имало околу 37.000 заболени од грип што е за околу 80 до 90 отсто повеќе од други години.

– Ги анализиравме бројките на пациенти со сезонски грип и за разлика од вообичаениот број до минатата година историски гледано повеќе години наназад биле околу 20.000, а оваа година се 37.000. Значи скоро 80 или 90 проценти повеќе заболени. Материјалите на тие пациенти кои се лекувале од сезонски грип и на кои им се земале брисеви се анализирале за присуство на други вируси предизвикувачи на сезонскиот грип, сѐ уште се во Институтот за јавно здравје и тие може дополнително да се тестираат да се види дали некој од тие пациенти бил заболен од коронавирусот. Меѓутоа сега целосно капацитетот е насочен на детекција на новите пациенти, затоа малку поспоро ќе оди ова да се изанализира и да се направи некаква ретроспектива што може да даде поточни податоци – рече Филипче во април годинава.