Обвинителството во Струмица предложи казни за 27 лица кои не го почитувале полицискиот час

Основното јавно обвинителство Струмица до надлежен суд поднесе предлози за издавање казнени налози против 27 лица за сторено кривично дело – Непостапување според здравствените прописи од член 206 став 1 од Кривичниот законик.

„Обвинетите не ги почитувале одлуките и мерките на владата со кои се забранува движење на населението на територијата на државата. Секој од нив, во одделни кривично правни настани, не постапил согласно прописите за сузбивање или спречување на опасната заразна болест предизвикана од коронавирусот, поради која е прогласена пандемија“, појаснуваат од ОЈО Струмица.

Основното јавно обвинителство Струмица до Основниот суд Струмица поднесе предлози за издавање казнени налози и за секој од обвинетите предложи судот да изрече парична казна во висина од по 50 дневни глоби, а секоја дневна глоба да е во висина од по 10 евра во денарска противвредност.​

Струмичкото обвинителство денеска поднесе и два обвинителни предлога против вкупно две физички и две правни лица за истото кривично дело.

Лицата како управители, вршеле продажба во нивните маркети, иако не поседувале дозвола за работа за време на полицискиот час.