ОБВИНИТЕЛСТВОТО ДА ПОСТАПУВА ЗА АРТАН ГРУБИ И ЗА ЕНВЕР БЕЏЕТИ Ако не реагираме, го толерираме беззаконието
Претседателката Гордана Сиљановска Давкова рече дека не смееме како досега да останеме мирни и да ги оставиме лицата кои се нашле на црната листа на САД да си продолжат со своите редовни активности, туку јавните обвинители треба да постапат по допрен глас, треба да постапуваат и во овој случај.
Очекувам Јавното обвинителство да почне да постапува во врска со наводите на САД, зашто во спротивно, ако ние не реагираме кога треба, така го толерираме беззаконието, рече денеска претседателката Гордана Сиљановска Давкова прашана каква порака испраќа САД со тоа што ги стави на црната листа поренешниот вицепремиер Артан Груби од ДУИ и апелацискиот судија Енвер Беџети.
– САД испраќа јасна порака дека во политиката и во институциите, вклучувајќи го и Судот, мора да се води сметка за допрен глас, а ова е допрен силен глас заснован на факти и докази. Не смееме како досега да останеме мирни и да ги оставиме лицата кои се нашле на црната листа да си продолжат со своите редовни активности. Ако јавните обвинители треба да постапуваат по допрен глас, треба да постапуваат и во овој случај. Во меѓународното право постојат начини како да се дојде до тие докази и да се започне постапка овде. Очекувам ЈО да почне да постапува – рече претседателката Сиљановска Давкова.
Редно е надлежните да постапуваат, додаде таа.
– Се разбира дека преумпцијата на невиност важи, но страшно е во политиката да има такви луѓе, особено со статус на копремиер. Кога прочитавме и име на судија, треба особено да сме загрижени, затоа што Судот треба да е синоним за правото и правдата. Неправдата и владеењето напресилни луѓе ги направиле сите институции слаби. Во тој случај, во духот на оценската мисија, се потребни итни чекори во сите органи – рече претседателката.
Оние 2 проценти доверба од граѓаните, додаде таа, всушност значат целосна недоверба, затоа што 2 е ниво на статистичка грешка.
– Сериозно треба да размислиме дали се креирал еден партизиран и политизиран судски систем. Треба да се тргне не само од конкретниот случај, туку да види како сите во судскиот систем се нашле на одредени позиции. Најголемиот дел од вината е во оние два најважни органи, Судскиот совет и Советот на јавни обвинители. Тие треба да се чуварот на независноста на правосудството, да бидат филтерот, лакмусот, микроскопот, рендгенот и не смеат да дозволуваат определен профил на луѓе кои се огрешиле и придонеле директно или индиректно на недовербата во судскиот систем, да бидат на позиции кадешто не смеат да бидат – рече претседателката Сиљановска Давкова.