ОБВИНИТЕЛСТВОТО ЈА ЗАПИРА ИСТРАГАТА ЗА КАРАДАКОСКИ Колегиумот на ЈО започна со минута молк за жртвите од Кочани

Основното јавно обвинителство соопшти дека ја запира истрагата за Александар Карадакоски, управителот на дискотеката „Пулс“ во Кочани, поради неговата смрт, додека сите капацитети на Јавното обвинителство се ставени на располагање на тимот за ефикасно завршување на истрагата.

„Со оглед на тоа што денешната 60-та жртва од катастрофалниот пожар во Кочани е лице кое претходно беше опфатено со наредбата за спроведување истражна постапка, во својство на управител на правно лице, Основното јавно обвинителство Кочани по прибавување на официјалната документација за настапената смртна околност ќе донесе наредба за запирање на истражната постапка за него“, соопшти ЈО.

Денешниот состанок на стручниот колегиум на Јавното обвинителство во проширен состав започна со минута молк за настраданите во трагедијата во Кочани.

На состанокот обвинителскиот тим кој постапува во предметот на ОЈО Кочани за утврдување кривична одговорност за трагедијата го запознал колегиумот со преземените дејствија до сега и, како што се вели во соопштението, со начинот и концептот на истражување и со стручните аспекти на предметот кои ги има предвид при истражувањето.

„Стручниот колегиум на Јавното обвинителство изрази целосна поддршка за досегашната работа на обвинителите, кои во моментов паралелно водат истражна и предистражна постапка од широк опсег со цел целосно испитување на одговорноста за овој настан. Сите капацитети на Јавното обвинителство се ставени на располагање на тимот за ефикасно завршување на истрагата“, велат од ЈО.

Карадакоски, кој се лекуваше во Литванија, е 60. жртва од страшниот пожар во дискотеката „Пулс“.