„ОБВИНИТЕЛСТВО ПОБРЗО ДА ИСТРАЖИ КАКО ФИЛИПЧЕ СИ КУПИЛ 5 СТАНА, ЏИП И ХАЦИЕНДА“ Блиски фирми на СДСМ преку тендери свртеа милиони евра народни пари, обвини Лефков
Судството и обвинителството со 2% доверба очигледно е споро и не гледа тоа што целата јавност го гледа, институциите да не чекаат и да почнат да постапуваат, побара денеска пратеникот и член на ИК на ВМРО-ДПМНЕ Миле Лефков.
СДСМ како власт ги користеле институциите за испумпување на пари преку тендери, обвини денеска на прес-конференција во седиштето на ВМРО-ДПМНЕ пратеникот и член на ИК на партијата, Миле Лефков. Тој рече и дека за проневерите се покренати постапки пред надлежните органи, но тие споро реагираат.
– Фирми блиски до СДСМ свртеа милиони евра народни пари од ЕСМ, преку РЕК, здравството, каде жареше и палеше Венко Филипче. Државниот ревизор при ревизија на буџетот за 2021 година, која е направена во 2023 година, кај дел од постапките за јавни набавки утврдил недоследности во начинот на планирање, спроведување и реализација, поради што за дел од истите започнати се постапки пред надлежни органи – рече Лефков.
Судството и обвинителството со 2% доверба очигледно е споро, додаде тој, и не гледа тоа што целата јавност го гледа.
– Треба да истражи и утврди како Венко Филипче има 5 стана во Скопје кои претходно не ги пријавувал во анкетен лист, луксузен џип, хациенда на семејството на Водно. Тоа е се имот кој треба да биде проверен како е стекнат – рече Лефков.
Стотици милиони се одлеани на сомнителни тендери, повтори Лефков, а сомнителност и недоследности утврдува и ДЗР.
– Институциите да не чекаат и да почнат да постапуваат – побара Лефков.