ОБВИНИТЕЛИТЕ МИЖАТ ПРЕД КРИМИНАЛОТ ВО РЕК БИТОЛА, ТЕЦ НЕГОТИНО, МЕПСО… ЈО да се разбуди и да почне да работи
Републичкиот јавен обвинител, Љупчо Коцевски не презема мерки за значајни предмети и покрај јавните докази за криминални активности и корупција, обвинителите и судиите избрани во Струмица и Зајас не смогнаа сили да се издигнат над ситуацијата и да делуваат професионално, соопшти ВМРО-ДПМНЕ.
Јавното обвинителство не превзема ништо против криминалот и корупцијата, треба да се разбуди и да почне да работи, обвини владејачката ВМРО-ДПМНЕ.
„СДСМ и ДУИ ја заробија правосудната власт и ја претворија во алатка за политички клиентелизам, што резултира со институционална инерција. СДСМ и ДУИ предизвикаа ерозија на довербата во јавните институции и судскиот систем. СДСМ и ДУИ го повредија владеењето на правото и ја поткопаа јавната верба во способноста на државата да обезбеди правда без да има присуство на пристрасност, особено кога политичките елити на СДСМ и ДУИ се вклучени. Врхушката на СДСМ и ДУИ се исплашени за милионите кои што ги спечалија на грбот на обичниот народ и поради тоа што се плашат дека доаѓа време за правда, тие посегнаа по примитивни методи, со што ја уназадуваат државата“, соопшти ВМРО-ДПМНЕ.
Обвинителите и судиите избрани во Струмица и Зајас, се додава во соопштението, не смогнаа сили да се издигнат над ситуацијата и да делуваат професионално.
„Обвинителите на кои Љупчо Коцевски им е надреден не постапуваат по наводите за криминал во РЕК Битола, ТЕЦ Неготино, МЕПСО, Онкологија, ЈПДП, Државна лотарија и многу други. Обвинителите и судиите на Заев и Ахмети за стотици предмети кога треба да се одлучува и да стави потпис на налог за увид, претрес или за лишување од слобода, со сите средства се трудат да ги опструираат процесите. Републичкиот јавен обвинител, Љупчо Коцевски не презема мерки за значајни предмети и покрај јавните докази за криминални активности и корупција“, потенцира ВМРО-ДПМНЕ.
Неактивноста на Јавниот обвинител, се потенцира во соопштението, доведува до незадоволство кај граѓаните од правосудниот систем кој се обидува да ги заштити своите разбојници од правни последици.
„На тој начин ја прошируваат корупцијата како да е нормална појава и комплетно го блокираат правосудството. Поради таквите постапки довербата на граѓаните во судскиот систем е 2 проценти. СДСМ и ДУИ ги окупираа институциите со нивните функционери за да ги заштитат нивните интереси и да ја задржат власта. На тој начин СДС и ДУИ ја лишија јавноста од правичност и отчетност. ЈО да се разбуди и почне да работи, граѓаните очекуваат правда и владеење на правото“, соопшти ВМРО-ДПМНЕ.