Обезбедени се пари за два месеци за лекот Kalydeco/Ivacftor за цистична фиброза
По овој период, Клиниката за детски болести ќе направи анализа за успешноста на примената терапија.
Фондот за здравствено осигурување соопшти дека ќе обезбеди условен буџет од вкупниот договорен буџет за 2021 година за ЈЗУ Клиника за детски болести за набавка на лекот Kalydeco/Ivacaftor во износ од 6.663.048 денари.
Лекот ќе се користи за обезбедување на здравствени услуги на трoјца пациенти кои се лекуваат во ЈЗУ Клиника за детски болести. Согласност за набавка на лекот побара Клиниката за детски болести, а Министерството за здравство издаде согласност за набавка на овој лек.
„Одобрението што го даде Фондот, е во траење од два месеци, по што од страна на Клиниката за детски болести ќе се направи анализа за успешноста на примената терапијата. Доколку резултатите се позитивни, а имајќи предвид дека се работи за доживотна терапија лекот Kalydeco/Ivacaftor по претходно спроведена процедура за негово вклучување преку Комисијата за ретки болести, понатаму ќе биде обезбедуван во рамките на Програмата за лекување на ретки болести за 2021 година, која е во надлежност на Министерството за здравство, а ја носи Владата на Република Северна Македонија“, се наведува во соопштението.