НСДП ГО ПОЗДРАВИ ПРОГРЕСОТ ВО СТАВОТ НА ВМРО-ДПМНЕ Партијата е спремна да ги поддржи уставните измени

НСДП го поздравува одржувањето на лидерската средба во насока на политичко обединување на кое, како што велат од партијата, повикале пред две недели и кое е неопходно за да се загарантира европската иднина на државата.

„Го поздравуваме прогресот во ставот на опозициската ВМРО-ДПМНЕ за прифаќање на уставните измени, кој процес треба веднаш да се започне во Собранието. НСДП е спремна со своите пратеници да поддржи влез на ВМРО-ДПМНЕ во Владата со цел остварување на највисокиот стратешки државен интерес-членство во Европската Унија, откако во Собранието заеднички ќе изгласаме прифаќање на Иницијативата за уставните измени“, се наведува во соопштението од НСДП.

Оттаму додаваат дека за НСДП македонскиот јазик и македонскиот идентитет се загарантирани и заштитени со усвојувањето на преговарачката рамка и нема простор за загриженост, тие се гарантирани од нашите стратешки партнери Европската Унија и САД.

„Повикуваме на државнички пристап од сите политички актери, на разум и да не дозволиме државата да стагнира, туку да бидеме одговорни и да го препознаеме политичкиот моментум за да исчекориме кон прогрес, реформи и општествен напредок кој го очекуваат граѓаните“, се додава во соопштението од НСДП.

НСДП има двајца пратеници во актуелниот собраниски состав и е во коалиција со СДСМ.