НСДП до ВМРО-ДПМНЕ: Ако се искрени, дајте од парите на Груевски во Будимпешта

НСДП ја обвини опозициската ВМРО-ДПМНЕ за неодговорно, недржавничко и деструктивно однесување за време на кризата поради коронавирусот.

„ Наместо препознавање на суштинското значање на овие работи, некои политички партии продолжуваат со своето неодговорно и недржавничко однесување, делувајќи деструктивно, често пати и со елементи на кривично дело. Овде предначи ВМРО-ДПМНЕ, која конечно сфати дека битката на следните парламентарни избори нема да се води на теми поврзани со НАТО, ЕУ или пак промената на името на државата, туку фокусот ќе биде на начинот со кој институциите се справуваат со овој „непријател“, кој не ја поштеди и нашата држава, притоа заканувајќи се да остави катастрофални последици врз целокупното општество“, пишува НСДП.

Од партијата предлагаат ВМРО-ДПМНЕ како „најбогата политичка партија во Европа, со имот вреден над 60 милиони евра, може да го следи нивниот пример и да насочи дел од своето богатство за набавка на опрема која е неопходна на здравствените институции во овие моменти.“

„Доколку се искрени во своите декларативни намери, им стои на располагање и конкретна можност да пренасочат дел од десетиците милиони евра кои ги однесе нивниот почесен претседател во Будимпешта и истите да се искористат за ублажување на економските последици. Ова е прво и последно обраќање во јавноста на НСДП додека трае вонредната состојба. Пристојноста налага доколку не сте во можност да помогнете да молчите“, порача НСДП.