Новозеландски министер се швалерисувал со вработена од кабинетот, се извинил и ја прифатил шуткартата (ВИДЕО)

Новозеландската премиерка Џасинда Ардерн го разреши министерот за имиграција Јан Лијс-Галовеј поради што една година бил во врска со вработена во неговиот кабинет.

Лијс-Галовеј изјави дека се согласува со одлуката на премиерката Ардерн и се извини. Тој истакна дека нема да учествува на престојните парламентарни избори, што се закажани во септември.

– Постапив целосно несоодветно и не можам да продолжам да ја извршувам финкцијата министер, истакна Лијс-Галовеј.

Лијс-Галовеј беше министер за имиграција и вработување. Тој ја изгуби довербата на премиерката Ардерн поради интимна врска со вработена која порано била во неговиот кабинет, а сега работи во една од неговите агенции.

Лијс-Галовеј е роден во Јужен Окланд, каде што израснал на фарма. Оженет е и е татко на три деца. Станал пратеник во 2008 година. Неговиот офис за имиграција беше обвинуван за уништување на соништата на мигранти, студенти и работници, како и на нивните семејства, бидејќи процесот за добивање виза често трае со месеци, па и повеќе од една година.

Пред неколку дена беше најавена оставка на 37-годишниот пратеник Ендрју Фалон од Националната партија, откако беше откриен дека испратил експлицитни фотографии на најмалку една 18-годишна девојка. Родителите на девојката се обратиле во премиерскиот кабинет за помош.