НОВИ СЛУЧАИ НА МОРБИЛИ ВО СРБИЈА Колективниот имунитет е паднат поради недоволно вакцинирање

Нови случаи на морбили во Србија се регистрирани на територијата на Нови Пазар, Белград, Нови Сад и Лозница, објави српски Блиц.

Најмногу заразени има во Нови Пазар – 23, 6 се во Белград, а по 1 случај во Нови Сад и во Лозница.

Во Белград од почетокот на годинава се регистрирани најмногу случаи на морбили – 94.

Засилените мерки сѐ уште важат

Во Србија сѐ уште се во сила засилените мерки на епидемиолошки надзор кои важат од 7 февруари и ќе останат до крајот на двојниот период на инкубација по последниот регистриран случај на мали сипаници.

Малите сипаници (морбили) се пренесуваат со директен контакт со болно лице – преку бакнување, ракување, преку воздух со респираторни капки испуштени од болно лице како што се кашлање и кивање, а ретко и индиректно преку свежо контаминирани предмети.

Инкубацијата, периодот од моментот на влегување на вирусот во телото до појавата на симптомите на сипаница, трае од 7 до 18 дена.

Симптоми

По инкубацијата (периодот од моментот на влегување на вирусот на сипаници во телото до манифестацијата на болеста, односно почетокот на симптомите) од 7 до 18 дена, се случува следново:

• појава на покачена телесна температура;
• назален секрет;
• кашлање;
• конјунктивитис (водени, црвени очи, отечени очни капаци).

Наведените симптоми на сипаница траат 2 до 4 дена, по што се јавува следново:

• скок на телесната температура (над 40 степени Целзиусови);
• појава на макулопапуларна сипаница првин на лицето, зад ушите и на вратот;
• сипаницата потоа се шири по телото и по екстремитетите.

Болното лице е заразно на последниот ден од инкубацијата (кога сѐ уште е без симптоми), 4 дена пред појавата на сипаници и 4 дена по појавата на сипаници.

Ова е токму најопасното бидејќи човек го шири вирусот без да сфати.

Компликации

Компликациите се почести кај децата под 5-годишна возраст и кај возрасните над 20-годишна возраст, а тие се:

• воспаление на белите дробови (пневмонија);
• воспаление на средното уво;
• дијареа;
• воспаление на мозокот;
• губење на видот;

Србија лани не достигна 95% покриеност со МРП вакцина

Ни лани, во 2023 година, Србија не достигна 95% покриеност со МРП вакцината против сипаници, заушки и рубеола, што е доволно за да се избегне епидемија. Опсегот е само неколку проценти поголем во споредба со 2022 година.

Најниски вредности на вакцинирање со МРП вакцина се регистрирани во Србија во текот на 2020 и 2021 година во последните 20 години.

Поради падот на колективниот имунитет, дојде до епидемија на морбили (по 20 години најголема епидемија во Србија со смртни исходи).