НОВИ ПРЕПОРАКИ ОД КОМИСИЈАТА Ковид сертификатите за прележаност да важат 180 дена

Комисијата за заразни болести на денешниот состанок одлучи да предложи до владата да се достави предлог сертификатите за прележан ковид наместо досегашните 45 дена да траат 180 дена, сметано по датумот на позитивен ПЦР тест, рече д-р Злате Мехмедовиќ на денешната прес-конференција.

Според последниот извештај на Институтот за јавно здравје во јануари годинава шест лица со примена трета доза вакцина починале, а сите смртни случаи имале дополнителни болести (дијабет, карцином, кардиоваскуларни и гојазност).

Комисијата препорача протоколи за лекување на пациенти од ковид-19, кои се изработени од работната група при МЗ и од катедрата за семејна медицина во соработка со матичните лекари.

– Препораката е тие да бидат подобро искомуницирани, односно да бидат објавени на сајтот на МЗ и на Лекарската комора и дополнително испратени до матичните лекари, како и ковид-центрите со цел да се олесни достапноста и примената на овие протоколи – вели д-р Мехмедовиќ.

Последната препорака која ја донела Комисијата за заразни болести е да се спроведе скрининг на ковид во училиштата за да се види дали преносливост на коронавирусот меѓу учениците, додека дел од тестовите ќе бидат искористени за т.н. стратегија „тестирај за да останеш на училиште“ а којшто предвидува изложените ученици во одделението каде што имало позитивен случај, па оние кои ќе покажат негативен резултат ќе може да останат да ја следат наставата.