НИКОГАШ НЕ СУМ РАЗГОВАРАЛ СО СТРАНСКИ ДИПЛОМАТ ЗА ПРИФАЌАЊЕ МИГРАНТИ Тошковски вели дека стопати повторената лага на СДСМ не може да стане вистина

„Најодговорно тврдам дека во рамки на мојот мандат со ниту еден странски дипломат не сум разговарал на тема за какво било прифаќање мигранти од страна на која било држава, никогаш ниту ми било поставено како прашање, ниту како барање, ниту сум го имал како разговор со кој било од нив“.

Вака за Канал 5 изјави министерот за внатрешни работи Панче Тошковски коментирајќи ги наводите на СДСМ за мигрантски кампови. Министерот вели дека стопати повторена лага не станува вистина.

– Опозицијата се повикува на британските медиуми, може да се повикува на кого сака, но сите релевантни чинители во државава (премиерот, министерот за надворешни работи, претседателката, јас кога бев во Брисел) негиравме дека тоа што го тврдат е невистина и лага.

Министерот посочи и дека секоја година се намалува бројот на мигранти што поминуваат низ државава, за пет, седум, осум проценти, како и дека годинава од страна на Министерството за внатрешни работи не е одобрено ниту едно барање за азил.

– Кога говориме за тема мигранти, тие транзитираат низ Македонија 10-15 години, а сега имаме и ново утврдување на кризна состојба во делот на мигранти поради она што го имаме веќе како фактичка состојба во државата. На граѓаните мора да им објасниме дека Македонија е клучен фактор во делот на овие процеси поврзани со илегална миграција од едноставна причина затоа што е на патот на нелегална миграција. Ние сме транзит земја и заради тоа сме многу клучни – рече Тошковски.

Во коментар на тврдењата за можноста за враќање на мигрантите во трети земји не само во земјата на потекло и споменувањето на Западен Балкан во тој контекст и договорот меѓу Италија и Албанија, рече дека „македонската опозиција почна да не прави разлика помеѓу Македонија и Албанија“.

– Ова е Македонија , не Албанија – рече министерот Тошковски.