Непознат вид на ковид-19 откриен во Јапонија, се разликува од другите соеви

Маж кој пристигнал во Јапонија од Филипините во февруари бил заразен со нов вид на вирусот ковид-19, соопшти денеска Министерството за здравство на Јапонија, наведувајќи дека ова е прв ваков случај, пренесе агенцијата „Кјодо“.

Досега непознатиот вид на коронавирусот се разликува од соевите откриени во Велика Британија, Јужна Африка и Бразил, но се верува дека ја претставува истата закана како и трите многу заразни соеви, додаде јапонската новинска агенција.

Според Министерството за здравство, човекот има над 60 години и дошол преку аеродромот Нарита во близина на Токио на 25 февруари, а станува збор за асимптоматски случај.

Тој бил позитивен на тестот кога бил под карантин на аеродромот.

Националниот институт за инфективни болести повика на посилни контроли на границата како дел од напорите да се запре ширењето на коронавирусот.