НЕОВЛАСТЕНО ГО КОРИСТЕЛЕ ПЕЧАТОТ Пријава за фалсификат во велосипедската федерација

Претседателот на Велосипедската федерација пријавил сомнеж за повеќе кривични дела извршени од поранешни членови на управното тело на организацијата.

Од Министерство за внатрешни работи информираат дека во Сектор за внатрешни работи Куманово, Е.Ц. (45) од Куманово, кој е претседател на Велосипедската федерација, пријавил дека неколку членови сториле кривични дела како фалсификување службена исправа, злоупотреба на службена положба и затајување.

Според пријавата, тие биле отповикани од функцијата членови на Управниот одбор на седница одржана на 11 март 2026 година. По нивното разрешување, наводно неовластено го употребиле печатот на федерацијата, кој им бил ставен на располагање од поранешниот секретар, и покренале иницијатива за свикување собрание на Велосипедската федерација.

Полицијата соопшти дека се преземаат мерки за расчистување на случајот и утврдување на сите околности.