НЕМА ВЕЌЕ ЅИРКАЊЕ Во Авганистан се забранија прозорци низ кои се гледаат жени
Гледањето жени - кои работат во кујната, во дворот или земаат вода од бунарот - може да доведе до несоодветни постапки, соопшти Владата на Авганистан.
Врховниот лидер на талибанците издаде наредба со којашто се забранува изградба на прозорци во станбените згради со поглед на областите што ги користат Авганистанките. Во случај да постојат такви прозорци, пак, на сопствениците ќе им се наложи да подигнат ѕид или да го блокираат погледот „за да не ги вознемируваат соседите“, се наведува во декретот.
„Новите згради не треба да имаат прозорци што овозможуваат да се види дворот, кујната, бунарот на соседот и другите области коишто најчесто ги користат жените. Гледањето жени – кои работат во кујната, во дворот или земаат вода од бунарот – може да доведе до несоодветни постапки“, соопшти Владата, преку објава од својот гласноговорник Забихула Муџахид на мрежата Икс.
Градските власти и другите надлежни одделенија ќе треба да ги следат градилиштата за да се осигураат дека не е можно да се погледне во куќата на соседот.